دکتۆر چیمەن بارزانی، ئەندامی لیژنەی ئاسایش و بەرگری لە ئەنجومەنی نوێنەرانی عێراق، لە ڕاگەیەندراوێکی تونددا بۆ ڕای گشتی، وەڵامی ئەو دەنگە نابەرپرسانە دەداتەوە کە باس لە نەمانی قەوارەی هەرێمی کوردستان دەکەن و جەخت دەکاتەوە کە ئەم قەوارەیە دەستکەوتێکی دەستووری و مێژووییە و موڵکی هیچ کەس و حزبێک نییە.
قەوارەی هەرێم؛ بەرهەمی خوێنی شەهیدان و ئەنفالکراوان
لە ڕاگەیەندراوەکەدا، دکتۆر چیمەن بارزانی ئاماژەی بەوە کردووە: “ئەم هەرێمە موڵکی گەلی کوردستانە و بەرهەمی خەباتی سەد ساڵەی باب و باپیرانمان و قوربانییانی ڕاپەڕین و پێشمەرگە قارەمانەکانە. سووکایەتیکردن بەم قەوارەیە، بازرگانیکردنە بە خوێنی هەزاران شەهیدی ئەنفال و کیمیاباران.”
پشتئەستوور بە دەستووری هەمیشەیی عێراق
ئەو ئەندامەی ئەنجومەنی نوێنەران جەختی لەوەش کردەوە کە هەرێمی کوردستان بەپێی ماددەکانی ١١٧ و ١٢١ی دەستووری ساڵی ٢٠٠٥ی عێراق، قەوارەیەکی یاسایی و فیدراڵییە و خاوەن دەسەڵاتی یاسادانان و جێبەجێکردن و دادوەرییە. ڕایگەیاند: “نەمانی ئەم قەوارەیە تەنها ویستێکی ناوخۆیی نییە، بەڵکو پرۆسەیەکی نێودەوڵەتییە و بە لێدوانی پۆپۆلیستی گۆڕانکاری تێدا ناکرێت.”
موزایدەی سیاسی نیشانەی مایەپووچییە
دکتۆر چیمەن بارزانی لە پەیامەکەیدا بۆ ئەو دەنگە نەشازانە دەڵێت: “موزایدەکردن بە چارەنووسی گەلەوە بۆ کۆکردنەوەی چەند دەنگێکی کاتی، نیشانەی مایەپووچی سیاسییە. هەرێمی کوردستان وەک قەوارەیەکی پۆڵایین دەمێنێتەوە و گەلی کوردستان بە هێزێکی لەبن نەهاتوو بەرگری لێ دەکەن.”
لەسەر ڕێبازی سەرۆک بارزانی بەردەوام دەبین
لە کۆتایی ڕاگەیەندراوەکەدا، دکتۆر چیمەن بارزانی دووپاتی کردەوە: “ئێمە لە پەرلەمانی عێراق، لەسەر ڕێبازی پیرۆزی سەرۆک مەسعود بارزانی و پارتی دیموکراتی کوردستان، داکۆکیکردن لە مافە دەستوورییەکانی خەڵکی کوردستان و ڕێگە نادەین هیچ دەنگێکی ناوخۆیی یان دەرەکی یاری بە چارەنووسی نەتەوەکەمانەوە بکات.”