ڕێکخراوی لێبوردنی نێودەوڵەتی ڕای گەیاند سێ هێرشی ئاسمانیی ئیسرائیل بۆ سەر ماڵ و شوێنی نیشتەجێبوون لە باشووری لوبنان، لە ڕۆژانی شەش، دوازدە و سێزدەی مارسدا ئەنجام دراون، دەبێ وەک تاوانی جەنگ لێکۆڵینەوەیان لەسەر بکرێت.
لەو هێرشانەدا لە ناوچەکانی سوور، سەیدا و نەبەتیە، ٢٤ کەسی سڤیل کوژران، لەنێویاندا ١٢ منداڵ و شەش ژن هەبوون و لانی کەم ١٨ کەسیش بریندار بوون.
ئەم دامەزراوە مافپەروەرە دوای گفتوگۆ لەگەڵ ڕزگاربووان، کارمەندانی فریاگوزاری و بەرپرسانی ناوخۆیی و پشکنینی وێنەی مانگە دەستکردەکان و ڤیدیۆی هێرشەکان، ئاماژەی بەوە کرد هیچ بەڵگەیەکیان لەسەر بوونی ئامانجی سەربازی لەو شوێنانەدا دەست نەکەوتووە.
بە گوتەی لێبوردنی نێودەوڵەتی، ئەم هێرشانە یان ڕاستەوخۆ کەسانی سڤیل و باڵەخانەی نیشتەجێبوونیان کردووەتە ئامانج، یان بەبێ جیاکاریی پێویست لەنێوان ئامانجی سەربازی و سڤیلدا ئەنجام دراون.
بەرپرسانی ئیسرائیلی گوتوویانە هەندێک هێرش لە لوبنان دژی ئامانجە سەربازییەکانی حیزبوڵڵا بووە و بارودۆخەکانی تریش لەژێر لێکۆڵینەوەدان، بەڵام سەبارەت بەم سێ هێرشە زانیارییەکی دیاریکراویان نەخستووەتە ڕوو.
لێبوردنی نێودەوڵەتی داوای گەمارۆی چەک بۆ سەر ئیسرائیل و ئەنجامدانی لێکۆڵینەوەی سەربەخۆی ناوخۆیی و نێودەوڵەتی لەو هێرشانە دەکات.