دەستەی دەسپاکی فیدراڵی ئەمڕۆ ڕایگەیاند کە ڕەشنووسی چەند یاداشتێکی لێکتێگەیشتنی نێودەوڵەتی ئامادە کردووە بە مەبەستی گێڕانەوەی پارە دزراوەکان و ڕادەستکردنەوەی تۆمەتبارانی دۆسیەکانی گەندەڵی.
عەباس مەتەب، بەڕێوەبەری گشتیی فەرمانگەی وەرگرتنەوە لە دەستەی دەسپاکی و جێگری سەرۆکی ئەنجومەنی بەڕێوەبردنی سندوقی گێڕانەوەی پارەکانی عێراق ڕایگەیاند: “هەندێک وڵات هەن کە بەهۆی هۆکاری تایبەت بە خۆیانەوە هاوکار نین لە دۆسیەی گێڕانەوەی پارەی گەندەڵکاراندا، لە بەرانبەریشدا وڵاتانی تر هەن کە لەم بوارەدا هاوکارن.”
ڕێگرییە یاساییەکان و چارەسەرە بەدیلەکان: ناوبراو ڕوونی کردەوە کە فەرمانگەکەیان ڕەشنووسێکی ئامادە کردووە بۆ واژۆکردنی یاداشتی لێکتێگەیشتن لەگەڵ ئەو وڵاتانە بۆ وەرگرتنەوەی پارە و تۆمەتباران، بەڵام یاسا ناوخۆییەکانی هەندێک لەو دەوڵەتانە ڕێگە بە گرتنەبەری ئەو ڕێوشوێنانە نادەن کە عێراق داوایان دەکات. بۆیە عێراق پەنا دەباتە بەر دانوستان و میکانیزمی بەدیل بۆ بەدیهێنانی هاوکاری.
هۆکاری ڕادەستنەکردنەوەی گەندەڵکاران: ئاماژە بەوەش کرا کە زۆرێک لە وڵاتان بەهۆی هۆکاری جۆراوجۆری وەک بەرژەوەندیی ئابووری یان لایەنی مرۆیی هاوکاریی عێراق ناکەن، و زۆرجاریش کەسی گەندەڵکار مافی پەنابەری لەو وڵاتانە وەرگرتووە، ئەمەش پڕۆسەی ڕادەستکردنەوەیان قورس دەکات.
راشیگەیاند: ئەم ڕێوشوێنانە لە کاتێکدایە کە حکومەتی عێراق بە سەرۆکایەتیی عەلی فالح زەیدی، چەندین هەنگاوی گرتووەتەبەر بۆ ڕاوەدوونانی داواکراوانی دۆسیەکانی گەندەڵی و چالاککردنی ڕێوشوێنە دادوەرییەکان بۆ گێڕانەوەی پارە دزراوەکان لە ناوەوە و دەرەوەی عێراق.
بەستنەوەی سستمی دەسپاکی بە ئینتەرپۆلەوە: پێشتر دەستەی دەسپاکی فیدراڵی ڕێککەوتنێکی هاوکاریی لەگەڵ نووسینگەی ناوەندیی نیشتمانیی ئینتەرپۆل لە بەغدا واژۆ کردبوو؛ بە مەبەستی گەیشتنی ڕاستەوخۆ بە سستمی زانیارییەکانی ئینتەرپۆل و بینینی زانیارییەکانی تایبەت بە داواکراوان، بۆ ئەوەی ئەو دەزگایانەی بەرپرسن لە لێکۆڵینەوە تاوانکارییەکان بتوانن بە هاوکاریی پۆلیسی نێودەوڵەتی لە وڵاتە جیاوازەکاندا کارەکانیان ڕاپەڕێنن.