ڕێبەری ڕەوتی نیشتمانیی شیعه، موقتەدا سەدر، سەرەخۆشی لە گەلی قەتەر و بنەماڵەی فەرمانڕەوای ئەو وڵاتە کرد بەهۆی کۆچی دوایی میری پێشووی قەتەر، هاوکات هیوای خواست ناوچەی کەنداو ببێتە مەڵبەندی ئارامی و سەقامگیری و دوور بێت لە بنکەی سەربازی و ململانێکان.
سەدر لە بەیاننامەیەکدا کە کۆپییەکی دەست ئاژانسی هەواڵی زاگرۆس کەوتووە و ڕایگەیاندووە “بە خەم و پەژارەیەکی قووڵەوە، سەرەخۆشی لە گەلی خوشک و برای قەتەر و بنەماڵەی فەرمانڕەوا دەکەین بۆ کۆچی دوایی میری دۆست”.
سەدر لە بەشێکی تری پەیامەکەیدا هیوای خواستووە کە “کەنداوی عەرەبی لەگەڵ دراوسێکانیدا، بەتایبەت لەگەڵ ئێران، لەناو کەشێکی ئارامدا بژین؛ بەبێ بوونی بنکەی سەربازی و ئاگری شەڕ”.
هەروەها داوای لە خودا کردووە کە “ئاشتی بەسەر گەلی قەتەردا ببارێنێت، و برایەتی و تەبایی بەسەر وڵاتانی ئیسلامی و عەرەبیدا بسەپێنێت، بەبێ پرۆسەی ئاساییبوونەوەی پەیوەندییەکان لەگەڵ ئیسرائیل و بەبێ تیرۆر، بەتایبەتی لە فەڵەستین و لوبنان”.
ئەم سەرەخۆشییە دوای ئەوە دێت کە دوێنێ یەکشەممە، دیوانی شاهانەی قەتەر لە بەیاننامەیەکی فەرمیدا، کۆچی دوایی میری پێشووی قەتەر شێخ حەمەد بن خەلیفە ئال سانی، لە تەمەنی 74 ساڵیدا ڕاگەیاند.
هەواڵی پێشوو