بەرپرسێکی وەزارەتی دەرەوەی ئەمریکا ڕایگەیاند، وڵاتەکەی پشتیوانی لە هەوڵەکانی عێراق و سووریا دەکات بۆ بونیادنانەوە و نۆژەنکردنەوەی ئەو هێڵە بۆرییەی کە نەوتی خاو لەنێوان هەردوو وڵاتدا دەگوازێتەوە.
ئەو بەرپرسە ئەمریکییە ئاماژەی بەوە کرد کە واشنتن چاوەڕوان دەکات کۆمپانیا ئەمریکییەکان ڕۆڵیان هەبێت لە خێراکردنی پرۆسەی بونیادنانەوە و نۆژەنکردنەوەی هێڵەکەدا. ئامانجی سەرەکیی ئەم هەنگاوەش ئەوەیە کە بەرهەمهێنەرانی نەوت بتوانن ڕێگەیەکی جێگرەوەیان هەبێت بۆ گواستنەوەی وزە و خۆیان لە مەترسییەکانی گەرووی هورمز لە کەناراوەکانی ئێران بەدوور بگرن.
ئەم لێدوانانە لە کاتێکدایە کە هەوڵەکان بۆ بوژاندنەوەی ژێرخانی وزە لە ناوچەکەدا بەردەوامن، بەتایبەت ئەو پڕۆژانەی کە دەبنە هۆی ئاسانکاری لە گەیاندنی نەوتی عێراق بۆ بەندەرەکانی سووریا لەسەر دەریای ناوەڕاست، وەک بەندەری بانیاس، کە ئەمەش کاریگەرییەکی بەرچاوی لەسەر بازاڕی وزەی جیهانی و کەمکردنەوەی پشتبەستن بە رێڕەوە ئاوییە پڕکێشەکان دەبێت.
ڕۆیتەرز