لە دەیەمین ساڵیادی “ڕۆژی دیموکراسی و یەکێتیی نیشتمانیی تورکیا”دا، نێچیرڤان بارزانی، سەرۆکی هەرێمی کوردستان، پەیامێکی گرنگی بڵاوکردەوە. بارزانی تێیدا هاوسۆزیی هەرێمی کوردستانی بۆ گەلی تورکیا دووپاتکردەوە و ئامادەیی هەولێری نیشاندا بۆ پەرەپێدانی زیاتری پەیوەندییە ستراتیژییەکانی لەگەڵ ئەنقەرە.
نێچیرڤان بارزانی لە ڕێگەی هەژماری فەرمی خۆی لە تۆڕی کۆمەڵایەتیی (X)، بە فەرمی یادی قوربانیانی ڕووداوەکەی ١٥ی تەممووزی ٢٠١٦ی کردەوە و ڕایگەیاند:”لە دەیەمین ساڵیادی ڕۆژی دیموکراسی و یەکێتیی نیشتمانیی ١٥ـی تەمووزدا، بەڕێزەوە یادی ئەو کەسانە دەکەینەوە کە گیانی خۆیان لە پێناو بەرگریکردن لە دیموکراسی و سیستمی دەستووریی تورکیادا بەخت کرد. لەم ڕۆژە یادکردنەوەیەدا، هاوسۆزیی خۆمان بۆ گەلی تورکیا ڕادەگەیەنین.”
سەرۆکی هەرێمی کوردستان تیشکی خستە سەر ئەو پێشکەوتنە خێرایانەی تورکیا لە ژێر سایەی سەرکردایەتیی ئێستایدا بەدەستی هێناون، و نووسیویەتی: تورکیا لەژێر سەرکردایەتیی ڕەجەب تەیب ئەردۆغاندا پێگەی خۆی وەک هێزێکی پێشەنگ و کاریگەر لە ناوچەکەدا بەهێزتر کردووە، لە ماوەی بیست ساڵی ڕابردوودا، وڵاتەکە گۆڕانکاریی گەورەی لە بوارەکانی گەشەپێدانی ئابووری، ژێرخان و بەهێزکردنی کاریگەریی نێودەوڵەتیدا بەخۆیەوە بینیوە.
لە کۆتایی پەیامەکەیدا، نێچیرڤان بارزانی پابەندبوونی هەرێمی کوردستانی بە پتەوکردنی زیاتری پەیوەندییە دووقۆڵییەکان دووپاتکردەوە. ئامانجە سەرەکەییەکانی، کارکردنی هاوبەش لە پێناو سەقامگیریی ناوچەکەدا، بەهێزکردنی هاوکارییەکان لەگەڵ سەرۆک کۆمار و حکومەتی تورکیا بۆ بەدیهێنانی گەشەپێدانی هاوبەش، بەرز نرخاندنی ئەو پەیوەندییە ئابووری و بازرگانییە بەهێزەی کە لە نێوان هەردوولادا هەیە.