لە چوارچێوەی گرنگیدانی کابینەی نۆیەمی حکومەتی هەرێمی کوردستان بە کەرتی کشتوکاڵ و ساغکردنەوەی بەرهەمی جوتیاران، ئێوارەی ئەمڕۆ سێشەممە 2026/8/18، بە ئامادەبوونی ئانۆ جەوهەر، وەزیری گواستنەوە و گەیاندن، ئومێد خۆشناو، پارێزگاری هەولێر، چیا هەرکی، یاریدەدەری بەرپرسی مەکتەبی ڕێکخستنی هەولێری پارتی دیموکراتی کوردستان، د. زانا مەلاخالید، بەرپرسی لقی 2، د. عەلی ڕەشید، سەرۆکی ئەنجوومەنی پارێزگای هەولێر و ژمارەیەک لە بەرپرسانی حکومی و پیاوانی ئایینی مەسیحی، پێنجەمین فێستیڤاڵی (سەبەتەی ترێ) لە قەزای عەنکاوە کرایەوە.
فێستیڤاڵەکە لە کێڵگەی جوتیاری نموونەیی (سەلوان سەردار) بەڕێوەچوو، تێیدا چەندین جۆری جیاوازی ترێی ناوخۆیی و بەروبوومی کشتوکاڵی نمایشکران. ئامانج لەم چالاکییە، هاندانی جوتیاران و ناساندنی زیاتری بەرهەمی نیشتمانییە بە بازاڕەکانی هەرێمی کوردستان.
لە پەراوێزی فێستیڤاڵەکەدا، ئومێد خۆشناو، پارێزگاری هەولێر وێڕای دەستخۆشی لە ڕێکخەران، ڕایگەیاند: “وەک حکومەتی هەرێمی کوردستان و پارێزگای هەولێر، هەموو پاڵپشتی و ئاسانکارییەک بۆ جوتیاران دەکەین، بە مەبەستی گەشەپێدانی زیاتری کەرتی کشتوکاڵ و بەبازاڕکردنی بەرهەمەکانمان لە ناوخۆ و دەرەوەی وڵات.”
جێی ئاماژەیە، فێستیڤاڵەکە بۆ ماوەی دوو ڕۆژ بەردەوام دەبێت و دەرگای بۆ هاووڵاتییان و ئارەزوومەندانی بەروبوومی خۆماڵی کراوە دەبێت، تا لە نزیکەوە ئاشنای جۆرە جیاوازەکانی ترێی دەڤەرەکە بن.