ئەمڕۆ چوارشەممە 2026/8/19، ئومێد خۆشناو، پارێزگاری هەولێر، بە ئامادەبوونی لوقمان سەعید، بەڕێوەبەری گشتیی پەروەردەی هەولێر، لە دیوانی پارێزگادا پێشوازی لە هادی عەبدولستار شبل، بەڕێوەبەری پەروەردەی ئاوارە و پەنابەرانی عێراق لە هەولێر و شاندێکی یاوەری کرد.
لە دیدارەکەدا، تیشک خرایە سەر دۆخی خوێندن و چۆنیەتی بەڕێوەچوونی پرۆسەی پەروەردەی قوتابییانی ئاوارە و پەنابەر لە سنووری پارێزگای هەولێر. لەمبارەیەوە پارێزگاری هەولێر دووپاتی کردەوە کە سەرجەم دامەزراوە پەیوەندیدارەکانی پارێزگا لە ئامادەیی تەواودان بۆ پێشکەشکردنی هەموو جۆرە ئاسانکاری و هاوکارییەکی پێویست، بە مەبەستی سەرخستنی پرۆسەی خوێندنی ئاوارەکان و ڕەخساندنی ژینگەیەکی گونجاو بۆ قوتابییان.
لای خۆشیانەوە، شاندی میوان سوپاس و پێزانینی قووڵی خۆیان ئاراستەی پارێزگاری هەولێر و بەڕێوەبەرایەتی گشتیی پەروەردەی هەولێر کرد، بۆ ئەو پاڵپشتییە بەردەوام و هەماهەنگییە بەهێزەی کە لەگەڵ ناوەندەکانی خوێندنی ئاوارە و پەنابەران هەیانە، کە ڕۆڵێکی گرنگی هەبووە لە بەردەوامبوونی پرۆسەی خوێندن لە کەمپ و ناوچە جیاجیاکاندا.