ئەکتەری ئەمریکی جۆنی دێپ نزیک دەبێتەوە لە گەڕانەوە بۆ جیهانی چەتەکانی دەریای کاریبی، پاش چەندین ساڵ لە دوورکەوتنەوە.
بەرهەمهێنەر جێری برۆکهایمەر پشتڕاستی کردەوە کە دانوستان لەگەڵ جۆنی دێپ دەکرێت بۆ دووبارە دەرکەوتنەوەی لە ڕۆڵی کاپتن جاک سپارۆ لە بەشی شەشەم.
جێری برۆکهایمەر لە بەشداریکردنی لە چالاکی کۆمپانیای دیزنی گوتی، تیمی کارکردن لەگەڵ جۆنی دێپ لە قسەکردندان و لەبارەی سیناریۆکە کار دەکەن. گوتیشی، لەو بڕوایەدایە دانوستانەکان سەرکەوتوو بن.
بەپێی ڕاپۆرتەکان چیرۆکی بەشە نوێیەکە تەنیا تیشک ناخاتە سەر جاک سپارۆ، بەڵکو ڕووداوەکان لە دەوری کەسایەتی مارگۆت ڕوبی دەسوڕێنەوە و جۆنی دێپ ڕۆڵێکی پاڵپشت دەگێڕێت.
دوایین فیلمی ئەم زنجیرەیە بە ناوی “Pirates of the Caribbean: Dead Men Tell No Tales” لە 2017 بڵاوکرایەوە و 795.9 ملیۆن دۆلاری کۆکردەوە.
داهاتی گشتی ئەم زنجیرەیە لە 4.5 ملیار دۆلار تێپەڕیوە. جۆنی دێپ ئێستا کار لەسەر فیلمی نوێی “Ebenezer: A Christmas Carol” دەکات کە لە 13ی تشرینی دووەم بڵاودەبێتەوە.