ئاژانسی فەرمیی هەواڵی سووریا (سانا) لە زاری سەرچاوەیەکی دیپلۆماسی لە وەزارەتی دەرەوەی ئەو وڵاتە بڵاویکردەوە، ڕۆژی یەکشەممە لە وڵاتی ئوردن، کۆبوونەوەیەکی ئاستبەرز لە نێوان سووریا و ئیسرائیل بە نێوەندگیری ویلایەتە یەکگرتووەکانی ئەمریکا بەڕێوەچووە.
بەگوێرەی زانیارییەکانی ئاژانسەکە، ئامانجی سەرەکیی ئەم کۆبوونەوەیە تاوتوێکردنی پرسی کەمکردنەوەی گرژییەکان و پشتیوانیکردن بووە لە چەسپاندنی سەقامگیری لەناو خاکی سووریا و ناوچەکە بە گشتی.
هەر لە هەواڵەکەدا هاتووە، گفتوگۆکان جەختیان لەسەر داڕشتنی میکانیزمێکی گونجاو کردووەتەوە بۆ ڕاگرتنی هێرش و دەستدرێژییەکانی ئیسرائیل، لەگەڵ کۆتاییهێنان بە پڕۆسەکانی دەستگیرکردن و بەئامانجگرتن کە لە ناوچەکەدا ڕوودەدەن.