ئەڤرۆ دووشەمبی، ٢٤ێ تەباخا ٢٠٢٦ێ، ب ئامادەبوونا د. عەلی تەتەر، پارێزگارێ دهۆکێ و ژمارەیەک ژ بەرپرسێن حزبی و حکومی و کەسوکارێن شەهیدان، ڕێوڕەسمەکا شایستە بۆ بیرئینانا پێنج گەنجێن پارێزگەها دهۆکێ هاتە گێڕان، ئەویت کو ل سالا ١٩٨٣ێ ب شێوەیەکێ دڕندانە ژ لایێ ڕژێما بەعس ڤە هاتبوونە شەهیدکرن.
د ڕێوڕەسمەکەدا کو ب ئامادەبوونا بریندار حەیدەر، دەڤەردارێ دهۆکێ، ژیان موستەفا، ڕێڤەبەرا گشتی یا شەهید و ئەنفالکریان، زوبێر عەبدوللا، نوینەرێ لقێ ئێک یێ پارتی دیموکراتی کوردستان و هەکار محەمەد ئەمین، ڕێڤەبەرێ لاوان ل دهۆکێ بڕێڤەچوو، پەردە ل سەر وێنەیێن وان پێنج شەهیدان هاتە لادان و ڕێز ل خەبات و قوربانیدانا کەسوکارێن وان هاتە گرتن.
ئەڤ پێنج گەنجێن بێگونەهـ، ل سالا ١٩٨٣ێ ل گۆڕەپانا ناڤەندا وەرزش و لاوان ل دهۆکێ، ژ لایێ ڕژێما دکتاتۆرا بەعس ڤە هاتبوونە گولەبارانکرن و شەهیدکرن.
د. عەلی تەتەر، پارێزگارێ دهۆکێ د کۆنگرەکێ ڕۆژنامەڤانی دا تیشک خستە سەر تاوانێن ڕژێما بەعس و ڕاگەهاند: “ئەو کارێن ڕژێما بەعس دژی ڤان گەنجان و مالباتێن وان ئەنجام داین، کارێن نەمروڤانە و دویر بوون ژ هەمی ڕەوشتێن مرۆڤایەتیێ.”
پارێزگارێ دهۆکێ دەستخۆشی ل ڕێڤەبەرییا لاوان کر بۆ سازکرنا ڤێ بیرئینانێ و داخواز کر: “پێدڤییە پەیکەرەکێ هەژی و دهربڕینێ بۆ ڤان هەر پێنج شەهیدان بهێتە چێکرن، دا کو سالانە ڕێوڕەسمێن ڕێزگرتنێ بۆ بهێنە گێڕان و وەک سیمبولەکێ خۆڕاگریێ ل دهۆکێ بمینن.”
ئەڤ ڕێوڕەسمە د چارچۆڤەیێ وەفاداریێ دایە بۆ خوینا شەهیدان و دوپاتکرنەڤەیا وێ چەندێ کو گەلێ کورد هیچ دەمەکێ تاوانێن ڕژێمێن داگیرکەر ژ بیر ناکەت.