وەزارەتی پێشمەرگەی حکومەتی هەرێمی کوردستان لە ڕاگەیەندراوێکی فەرمیدا هۆشداری دەداتە تەواوی ئەفسەران و پێشمەرگەکان کە وێنە و ڤیدیۆی سەربازیی خۆیان بۆ هیچ کەس و پەیجێک نەنێرن.
لە ڕاگەیەندراوەکەی وەزارەتدا هاتووە: “لەم ڕۆژانەدا تێبینی کراوە کە بەشێک لە پەیج و ئەکاونتەکان لە تۆڕە کۆمەڵایەتییەکان داوا لە ئەفسەر و پێشمەرگەکان دەکەن وێنە و ڤیدیۆی چالاکییە سەربازییەکانیان و بەشدارییان لە شەڕەکاندا بۆ بنێرن.”
وەزارەتی پێشمەرگە جەخت دەکاتەوە کە ئەم کارە مەترسی بۆ سەر زانیارییە کەسی و گشتییەکان هەیە، هەر بۆیە داوا دەکات: “بۆ پاراستنی خۆتان و یەکە سەربازییەکانتان، بە هیچ شێوەیەک وێنە و ڤیدیۆی تایبەت بە چالاکییە سەربازییەکان بۆ هیچ کەس و لایەنێک مەنێرن و بەوپەڕی وشیارییەوە مامەڵە لەگەڵ سۆشیاڵ میدیادا بکەن.”
راگەیاندنی وەزارەتی پێشمەرگە
لەم ڕۆژانەدا، بەشێک لە پەیج، ئەکاونت و کەسایەتیەکان لە تۆڕە کۆمەڵایەتیەکاندا، داوا لە ئەفسەران و پێشمەرگە دەکەن کە وێنە و ڤیدیۆی بەشداریکردنیان لە شەڕەکاندا و بە جلوبەرگی سەربازییەوە بۆ بنێرن.
بۆیە داوا دەکەین بۆ پاراستنی زانیارییە کەسی و گشتیەکان، ئەفسەر و پێشمەرگەکانی کوردستان لەم بابەتەدا زۆر وشیار بن و بە هیچ شێوەیەک وێنە و ڤیدیۆی تایبەت بە چالاکیە سەربازییەکانیان بۆ هیچ کەس و لایەنێک نەنێرن، بەتایبەت لەناو تۆڕە کۆمەڵایەتیەکاندا.
بەوپەڕی بەرپرسیاریەتی و وشیارییەوە مامەڵە لەگەڵ ئەم پرسەدا بکەن و خۆتان و یەکە سەربازییەکانتان بپارێزن.