چەکدارانی حوسیی لە پێشڕەوییەکی خێرادا گەیشتنە دوورگەی ستراتیژیی «پریم» لە دەمی گەرووی باب ئەلمەندەب، دوای ئەوەی هێزەکانی حکومەتی یەمەن لەو ناوچەیە پاشەکشەیان کرد؛ ئەمەش دەسەڵاتی حوسییەکان بەسەر یەکێک لە گرنگترین ڕێڕەوە ئاوییەکانی بازرگانی و کەشتیوانیی جیهاندا بەهێزتر دەکات.
سەرچاوەکانی حکومەتی دانپێدانراوی نێودەوڵەتیی یەمەن ڕایانگەیاند کە هێزەکانیان لە دوورگەی «پریم» (کە بە دوورگەی مەیونیش ناسراوە) کشاونەتەوە، هاوکات چەکدارانی حوسی کۆنتڕۆڵی شارۆچکەی کەناراویی «زوباب»یشیان لە دەریای سوور کردووە کە دەکەوێتە بەرامبەر دوورگەکە. ئەم پێشڕەوییە دوای ئەوە دێت کە ڕۆژێک پێشتر حوسییەکان دەستیان بەسەر شاری بەندەریی «موخا» و دوورگەکانی «حەنیش»دا گرت بوو.
گرنگیی جیۆپۆلەتیکی و کاریگەری لەسەر بازاڕی نەوت
کۆنتڕۆڵکردنی گەرووی باب ئەلمەندەب لەلایەن حوسییەکانەوە—لە بەرامبەر گەرووی هورمز لە دیوەکەی تری نیمچەدوورگەی عەرەبی—دەکرێت پێگەیەکی بەهێز و یەکلاکەرەوە بداتە تاران لە ململانێکانیدا لەگەڵ ویلایەتە یەکگرتووەکانی ئەمریکا. ئەمەش ئاستەنگ بۆ دووەم گرنگترین ڕێڕەوی گواستنەوەی وزە دروست دەکات و هۆکار دەبێت بۆ بەرزبوونەوەی زیاتری نرخی نەوت.
سعودیە کە گەورەترین هەناردەکاری نەوتە لە جیهاندا، پاش سنوورداربوونی هاتوچۆ لە گەرووی هورمز، پشتی بە ڕێڕەوی دەریای سوور بەستبوو. لە گۆڕانکارییەکی مەترسیداریشدا بۆ ڕیاز، وێنە مانگە دەستکردەکان دووکەڵیان لە نزیک هێڵی بۆریی نەوتی «ڕۆژهەڵات-ڕۆژئاوا»ی سعودیە نیشانداوە، کە هێڵێکی سەرەکییە بۆ گواستنەوەی نەوتی خاو بەرەو دەریای سوور بە مەبەستی خۆدزینەوە لە مەترسییەکانی گەرووی هورمز. بەپێی ئاژانسی نێودەوڵەتیی وزە، هەناردەی نەوتی سعودیە لە مانگی ئابدا بۆ ٦ ملیۆن بەرمیل لە ڕۆژێکدا دابەزیوە کە نزمترین ئاستە لە ماوەی سێ دەیەی ڕابردوودا، هاوکات نرخی نەوتی جیهانیش لە سەرووی ١٠٠ دۆلار بۆ هەر بەرمیلێک مامەڵەی پێوە دەکرێت.
ئامادەکاریی حکومەتی یەمەن بۆ هێرشی پێچەوانە
لە بەرامبەردا، هێزەکانی حکومەتی یەمەن ڕایانگەیاند کە ئامادەکاری دەکەن بۆ ئەنجامدانی هێرشێکی پێچەوانە و وەرگرتنەوەی ئەو ناوچانەی کەوتوونەتە دەست حوسییەکان.
عەقید ماجد ئەلنەزیلی، وتەبێژی سەربازیی حکومەت، هۆشداریی دایە هاوڵاتییان کە لە ڕێگەی نێوان تەعیز و موخا و کەلوپەلە سەربازییەکانی حوسییەکان دووربکەونەوە، چونکە هێزەکانیان چەک و فڕۆکەی جەنگی بەکاردەهێنن بۆ لێدانی هەر جووڵەیەکی چەکدارانی حوسی لە ناوچە کەناراوییەکاندا.
ترەمپ داواکارییەکەی بن سەلمان بۆ بۆردومانی حوسییەکان ڕەتدەکاتەوە
لەسەر ئاستی دیپلۆماسی و نێودەوڵەتی، ماڵپەڕی «ئەکسیۆس»ی ئەمریکی ئاشکرای کرد کە محەمەد بن سەلمان، شازادەی جێنشینی سعودیە، لە دوو پەیوەندیی تەلەفۆنیدا داوای لە دۆناڵد ترەمپ، سەرۆکی ویلایەتە یەکگرتووەکانی ئەمریکا کردووە کە هێرشی ئاسمانی بکاتە سەر پێگەکانی حوسییەکان.
بەپێی سەرچاوە ئەمریکییەکان، ترەمپ ئەو داواکارییەی ڕەتکردووەتەوە و ئیدارەکەی لەم کاتەدا هیچ نیازێکی نییە بە شێوەیەکی ڕاستەوخۆ بچێتە ناو شەڕی سەربازی دژ بە حوسییەکان، سەرەڕای ئەوەی واشنتۆن نیگەرانە لە پەرەسەندنی ململانێکانی یەمەن و پشتیوانییەکانی بۆ سعودیە چڕتر دەکاتەوە.
هاوکات، ڕۆژنامەی «فاینانشناڵ تایمز» بڵاویکردەوە کە وەزیرانی دەرەوەی وڵاتانی کەنداو بە نیازن ڕۆژی دووشەممە لە شاری سەڵاڵەی وڵاتی عومان لەگەڵ هاوتا ئێرانییەکەیان کۆببنەوە، بە مەبەستی گەیشتن بە ڕێککەوتنێکی کاتی بۆ ئاساییکردنەوە و بەڕێوەبردنی کەشتیوانی لە گەرووی هورمزدا.