پسکیت بۆ زۆر خێزان وەک ژەمێکی سووکی ئاسایی و تەنانەت بەشێک لە ژەمی بەیانیان بەکاردەهێنرێت، بەڵام سادەیی دەرکەوتنی ئەم بەرهەمە و توانای مانەوەی بۆ ماوەیەکی درێژ، بەو مانایە نییە لە ڕوانگەی خۆراکییەوە هەڵبژاردنێکی بێ کێشە بێت. کێشەکە تەنها لە شیرینیی پسکیتدا کورت نابێتەوە، بەڵکوو پێکهاتەی ماددە سەرەتایییەکان، بڕی شەکر و چەوری، جۆری چەوریی بەکارهاتوو و پرۆسەی گەرمکردن دەتوانن کاریگەری بخەنە سەر کوالیتی و سەلامەتیی ئەم بەرهەمە.
یەکێک لە گرنگترین نیگەرانییە زانستییەکان لەسەر بەرهەمە برژاوەکان بوونی ماددەی ئاکریلامیدە. ئەم پێکهاتەیە لە ئەنجامی گەرمیی بەرز لە هەندێک خۆراکی نیشاستەییدا دروست دەبێت و پسکیت لەو کۆمەڵە خۆراکانەدایە دەکرێت ئەم ماددەیەی تێدا بێت. دەستەی سەلامەتیی خۆراکی ئەورووپا (EFSA) ڕایگەیاندووە بوونی ئاکریلامید لە خۆراکدا جێگەی نیگەرانییە بۆ تەندروستیی گشتی؛ ئەگەرچی بەڵگەکانی لێکۆڵینەوە لەسەر مرۆڤ کەم و ناتەبان، بەڵام تاقیکردنەوەکان لەسەر ئاژەڵان دەریانخستووە ئەم پێکهاتەیە دەبێتە هۆی گۆڕانی بۆماوەیی و نەخۆشیی شێرپەنجە.
ئاکریلامید زیاتر لەو خۆراکە نیشاستەییانەدا دروست دەبێت پلەی گەرمیی بەرز و شێداریی کەمیان لە کاتی برژاندن یان سوورکردنەوەدا هەیە. کارلێکی مایارد، واتە ئەو زنجیرە کارلێکەی ڕەنگی قاوەیی و تام و بۆنی خۆش بە خۆراک دەبەخشێت، ڕێگەی سەرەکیی دروستبوونی ئاکریلامیدە لە نێوان شەکرەکان و ترشە ئەمینییەکان، بەتایبەت ترشی ئاسپاراژین. لەبەر ئەوەی پسکیت بە پلەی گەرمیی بەرز و تا گەیشتن بە شێداریی زۆر کەم دەبرژێنرێت، ئەم مەسەلەیە گرنگییەکی تایبەتی بۆ دروست دەبێت.
پشکنینەکان دەریدەخەن بە کۆنترۆڵکردنی کارلێکی مایارد، ڕێکخستنی پلەی گەرمی و کاتی برژاندن، دەتوانرێت ڕێژەی ئاکریلامید زیاتر لە ٩٠ لەسەد داببەزێنرێت، هەروەها بەکارهێنانی دژەئۆکسێنەرەکان لە هەندێک لێکۆڵینەوەدا بووەتە هۆی کەمکردنەوەی ٥٠ تا ٩٠ لەسەدی ئەم ماددەیە. لەگەڵ ئەوەشدا کڕیار ناتوانێت لە کاتی کڕیندا بڕی ئاکریلامید لە ڕێگەی دەرکەوتنی دەرەکی یان ناوی ماددەکانەوە دیاری بکات، چونکە پێوانەکردنی تەنها لە تاقیگە پێشکەوتووەکاندا و لە ڕێگەی ئامێرەکانی کرۆماتۆگرافی و شەبەنگپێوانەوە ئەنجام دەدرێت.
شارەزایان چەندین ڕێنمایی بۆ هەڵبژاردنی باشتر دەخەنە ڕوو:
یەکەم: دوورکەوتنەوە لەو بەرهەمانەی زۆر برژاون یان ڕەنگیان زۆر تۆخ و سووتاوە.
دووەم: هەڵبژاردنی بەرهەمی کۆمپانیا باوەڕپێکراوەکان کە چاودێریی کوالیتیی بەرهەمهێنان دەکەن.
سێیەم: دروستکردنی هەمەجۆری لە خۆراکدا و نەبەستنەوەی ژەمەکان تەنها بە یەک بەرهەمەوە.
چوارەم: کەمکردنەوەی بەکارهێنانی ڕۆژانەی پسکیت.
هەروەها دەبێت لە کاتی کڕیندا سەرنجی خشتەی بەهای خۆراکی بدرێت. وشەکانی وەک «سبووسدار»، «پڕ لە ڤیتامین» یان «بێ شەکری سپی» بە تەنیا بە مانای تەندروستبوونی تەواوی بەرهەمەکە نین. ڕێکخراوی تەندروستیی جیهانی ڕێنمایی دەدات بنەمای پارێزی تەندروست لەسەر خواردنی دانەوێڵەی تەواو، پاقلەمەنی، میوە و سەوزە دابمەزرێت و بەکارهێنانی شەکر و چەورییە ناتەندروستەکان بە تەواوی سنووردار بکرێت. کەواتە پسکیت خۆراکێکی ژەهراوی یان قەدەغەکراو نییە، بەڵام بەکارهێنانی زۆری دەتوانێت ببێتە بەشێک لە شێوازی ناتەندروستی ژیان.