دەسەڵاتدارانی ئەندۆنیسیا ڕایانگەیاند، گەمییەکی نەفەرهەڵگر کە ٢٤٣ سەرنشینی هەڵگرتبوو، بەهۆی خراپیی کەشوهەواوە لە دەریای “جاڤا” ژێرئاو کەوتووە؛ بەهۆیەوە لانیکەم شەش کەس گیانیان لەدەستداوە و ١٠٧ کەسی دیکە ڕزگار کراون، هاوکات گەڕان بەدوای ١٣٠ سەرنشینی بێسەروشوێندا بەردەوامە.
بەگوێرەی ئاژانسی هەواڵی فەرمیی ئەندۆنیسیا (ئانتارا)، گەمیی “ڤیرگۆ ترانسپۆرت ٨” (Virgo Transport 8) لە بەندەری جەنجاڵی شاری سورابایاوە بەرەو شاری بانجارماسین لە باشووری هەرێمی کالیمانتان لە گەشتدا بووە، بەڵام لە ئاوە هەرێمییەکاندا تووشی ڕەشەبا و کەشوهەوایەکی زۆر نالەبار بووە و پەیوەندی لەگەڵ پچڕاوە. دوایین شوێنپێی گەمییەکە لە کاتژمێر ٠٢:٠٠ی بەرەبەیانی ڕۆژی یەکشەممەدا لە دووریی نزیکەی ١٥٠ کیلۆمەتر لە باشووری شاری بانجارماسین تۆمار کراوە.
دەستەی گەڕان و فریاگوزاریی ئەندۆنیسیا ئاشکرای کرد کە ئۆپەراسیۆنێکی فریاکەوتنی بەرفراوان لە ناوچەکە دەستی پێکردووە؛ بۆ ئەو مەبەستەش چەندین کەشتی، هێلیکۆپتەرێک و ٢٨٠ کارمەندی فریاگوزاری ڕەوانەی شوێنی ڕووداوەکە کراون.
هاوکات دەسەڵاتداران هۆشدارییان داوەتە سەرجەم ئەو کەشتی و بەلەمانەی لە دەریای جاڤادا هاتووچۆ دەکەن، بۆ ئەوەی بە وریایییەوە چاودێریی ڕێڕەوەکانیان بکەن و لە ئەگەری بینینی هەر سەرنشینێک یان ئاماژەیەکی پەیوەندیدار، دەستبەجێ تیمەکانی گەڕان و ڕزگارکردنی لێ ئاگادار بکەنەوە.