نەخۆشیی ڤایرۆسی ئیبۆلا لە کۆماری دیموکراتیی کۆنگۆ بۆ حەوتەمین پارێزگا تەشەنەی سەند و ژمارەی تووشبووان بەردەوام لە زیادبووندایە. سەرباری ئەمەش، پسپۆڕان هەندێک نیشانەی ئومێدبەخش دەبینن.
بەپێی نوێترین ئاماری پەیمانگەی نیشتمانیی تەندروستی لە کینشاسای پایتەختی کۆماری دیموکراتیی کۆنگۆ، تا ئێستا زیاتر لە حەوت هەزار کەس لەم شەپۆلەی بڵاوبوونەوەی ئیبۆلادا لە وڵاتەکە بە تەواوی تووشی نەخۆشییەکە بوون.
ئێستا ئەم نەخۆشییە بۆ حەوتەمین پارێزگای ئەم وڵاتەی ئەفریقای نێوەڕاست پەڕیوەتەوە.
پسپۆڕان پێیان وایە ژمارەی ڕاستەقینەی تووشبووان زۆر زیاترە لە ئامارە تۆمارکراوەکان. جیا لەوەش، تەنها ئەو حاڵەتانە لە ئامارەکەدا هەژمار کراون لە دوای ڕاگەیاندنی فەرمیی نەخۆشییەکە لە ١٥ی ئایاردا تۆمار کراون. گومان دەکرێت ئەم بڵاوبوونەوەیە چەند مانگ پێشتر هەبووبێت بەڵام دەستنیشان نەکرابێت.
بەپێی ڕاگەیاندنی بەرپرسان، لەنێو حەوت هەزار و ٢٢ حاڵەتی تۆمارکراودا، سێ هەزار و ٣٩٨ کەس گیانیان لەدەست داوە. لە ئێستادا ٨٣٧ کەس لە کەرەنتین یان لەژێر چارەسەردان.
بۆ یەکەم جار حاڵەتێکی تووشبوون لە پارێزگای سوود-ئۆبانگی لە باکووری ڕۆژئاوای وڵاتەکە دەستنیشان کراوە. ئەم پارێزگایە دەبێتە حەوتەم ناوچەی تووشبوو بە نەخۆشییەکە. سەرەتا نەخۆشییەکە لە ڕۆژهەڵاتی ئەم دووەم گەورە وڵاتەی ئەفریقاوە سەری هەڵ دابوو.
هەرچەندە ئەم ئامارە خێراترین بەرزبوونەوەی تۆمارکراوی تووشبوون بە ئیبۆلا نیشان دەدات، بەڵام نێوەندی کۆنترۆڵ و پێشگرتن لە نەخۆشییەکانی ئەفریقا (Africa CDC) باسی لە نیشانەی هیوابەخش کردووە.
یاپ بۆم، پسپۆڕی دیاری نەخۆشییە گوازراوەکان ڕایگەیاند لە چەندین نێوەندی سەرەکیی بڵاوبوونەوە لە پارێزگای ئیتووری لە باکووری ڕۆژهەڵاتی کۆنگۆ ڕێژەی تووشبوون کەمێک دابەزیوە.
خێراییی بەرزبوونەوەی ژمارەی گیانلەدەستدان تا ڕادەیەکی زۆر کەم بووەتەوە؛ لەوانەیە هۆکارەکەی ئەوە بێت کەسانی زیاتر لە قۆناغە سەرەتایییەکانی نەخۆشییەکەدا سەردانی نێوەندە تەندروستییەکان دەکەن.
سەرباری ئەوەش، ژمارەی ئەو کەسانەی لە دەرەوەی نێوەندە تەندروستییەکان و لە گوندەکان یان نەخۆشخانە ئاسایییەکاندا گیان لەدەست دەدەن، هێشتا زۆر بەرزە.
تای ئیبۆلا نەخۆشییەکی مەترسیدارە بۆ سەر ژیان. ڤایرۆسەکە لە ڕێگەی بەرکەوتنی جەستەیی و شلە جەستەیییەکانەوە دەگوازرێتەوە و دەبێتە هۆی تای بەرز، سکچوون و خوێنبەربوون.
کۆنترۆڵکردنی بڵاوبوونەوەی ئێستا بەتایبەتی سەختە، چون بۆ جۆرێکی ڤایرۆسی ئیبۆلا بە ناوی بۆندیبۆگیۆ (Bundibugyo) تا ئێستا نە کوتانی تایبەت دۆزراوەتەوە و نە چارەسەری تایبەتیش لەبەر دەستدایە.