عەبدوڵڵا حاجی مەحموود، وەزیری شەهیدان و ئەنفالکراوانی حکوومەتی هەرێمی کوردستان، بۆ زاگرۆس ڕایگەیاند کە حکوومەتی هەرێمی کوردستان و سەرۆکوەزیران زۆر ڕژدن لەسەر خزمەتکردنی کەسوکاری شەهیدان و دابینکردنی تەواوی ماف و شایستە داراییەکانیان، هەروەها ئاشکرای کرد کە لەدوای پەسەندکردنی بودجەی ساڵی ٢٠٢٧ و تەرخانکردنی بودجەی پێویست، مووچەی زیندانیانی سیاسی لە هەرێمی کوردستان لە ٥٠٠ هەزار دینارەوە دەبێتە ١ ملیۆن و ٢٠٠ هەزار دینار.
وەزیری شەهیدان و ئەنفالکراوان ئاماژەی بەوە دا کە سەرجەم زیندانیانی سیاسی لە هەرێمی کوردستان فەرمانی وەرگرتنی زەوییان بۆ دەرچووە و تەنیا دیاریکردن و دەستنیشانکردنی شوێنی زەوییەکان ماوە، داواشی کرد هەرکەسێک کێشەی لە ناوەکەیدا هەیە سەردانی وەزارەتی شەهیدان و ئەنفالکراوان بکات. ڕوونیشی کردەوە بەگوێرەی یاسای ژمارە ١١ی ساڵی ٢٠١١ خزمەتگوزارییەکان بۆ زیندانیانی سیاسی کراونەتە دوو بەش؛ بەشێکیان هاوکاری داراییان بۆ خەرج کراوە و پرۆسەکە بۆ بەشەکەی دیکەش بەردەوام دەبێت.
لەبارەی پرسی یەکخستنی مووچە و شایستەکان، ڕایگەیاند کە دوو لێکتێگەیشتنیان لەگەڵ دامەزراوەی شەهیدان و زیندانیانی سیاسیی حکوومەتی عێراق هەیە و لە کۆبوونەوەکانیدا لەگەڵ لایەنە پەیوەندیدارەکانی عێراق داوای کردووە شایستە داراییەکانی شەهیدان و ئەنفالکراوانی هەرێمی کوردستان هاوشێوەی بەغدای لێ بکرێت، لە ئێستاشدا لایەنی ئیداری و کارگێڕی ڕێکخراوە بۆ ئەوەی پرۆسەکە بەپێی پێشنیازی حکوومەتی هەرێم بۆ بەغدا بڕوات.
جەختیشی کردەوە کە لە ئێستادا مووچەی زیندانیانی سیاسی لە بەغدا ١ ملیۆن و ٢٠٠ هەزار دینارە لە کاتێکدا لە هەرێم ٥٠٠ هەزار دینارە، بەڵام بە پەسەندکردنی بودجەی ٢٠٢٧ دەکرێتە ١ ملیۆن و ٢٠٠ هەزار دینار، وەزارەتیش بە هەموو توانایەوە لە هەوڵدایە بۆ تەواوکردنی ئەو مافە داراییە ڕەوایانەی کە ماون و پرۆسەکە بە شێوازێکی ڕێک و پێک بەڕێوە دەچێت.