داڕمانی بەشێکی بەستەڵەکێک لە زنجیرەچیاکانی هیمالایا، جەخت لەسەر زەنگە مەترسیدارەکانی گۆڕانی کەشوهەوا دەکاتەوە و بەراوردکاری لە نێوان ڕووداوە واقعییاکان و سیناریۆی فیلمی سینەمایی “Digger” دەستپێدەکات.
لە 26ی ئابی 2026، ناوچەی هیمالایا لە نزیک سنووری نیپاڵ ڕووبەڕووی داڕمانێکی گەورەی بەشێک لە ڕووبارێکی سەهۆڵی بووەوە. ڕووداوەکە دوای ئەوە هات کە پارچەیەکی زەبەلاح لە سەهۆڵ و بەرد لە بەرزیی نزیکەی 5200 مەتری سەر ئاستی دەریاوە جیا بووەوە و بەرەو دۆڵەکە کەوتە خوارەوە، ئەمەش بووە هۆی دروستبوونی لافاوێکی بەهێز لە ئاو، زەوی و پاشماوەکان.
ئەم ڕووداوە سروشتییە بووە هۆی ڕوودانی لافاوی لەپڕ و هاوڕێ لەگەڵ زیانی ماددی گەورە لە ناوچە نزمەکاندا، هاوکات نیشانەکانی مەترسییە ڕوو لە زیادبووەکانی پەیوەست بە ناڕەئارامی سەهۆڵبەندەکانی ناوچەی هیمالایای زەقتر کردەوە.
بەپێی ڕاپۆرتە زانستییەکان، گۆڕانکارییەکانی کەشوهەوا و بەرزبوونەوەی پلەکانی گەرما هۆکاری سەرەکین لە تێکدانی سەقامگیریی ناوچە سەهۆڵییەکان، ئەگەرچی دیاریکردنی هۆکاری وردی هەر داڕمانێک پێویستی بە لێکۆڵینەوەی مەیدانی و زانستی بەردەوام هەیە.
هاوکات لەگەڵ ئەم ڕووداوە، بەراوردکاری لە نێوان ئەم لافاوە واقعییە و ڕووداوەکانی فیلمی “Digger” لە پاڵەوانێتی ئەکتەری جیهانی تۆم کروز دروست بوو. چیرۆکی فیلمەکە لەسەر کارەساتێکی ژینگەیی بنیات نراوە کە بە داڕمانی کتوپڕی بەستەڵەکێکی گەورە دەستپێدەکات و دواتر دەبێتە هۆی زنجیرەیەک مەترسیی فراوان بۆ سەر ناوچە جیاوازەکان.
ئەگەرچی چیرۆکی فیلمەکە خەیاڵییە و لێکەوتەکانی لە ڕووداوەکەی نیپاڵ بەرفراوانتر نیشان دراون، بەڵام هاوشێوەیی سنوردار لە نێوان دیمەنە سەرەکییەکانی فیلمەکە و داڕمانەکەی هیمالایا، جارێکی دیکە سەرنجی خستەوە سەر ئەو مەترسییە ژینگەیییانەی کە پێشتر تەنیا لەسەر پەردەی سینەما دەبینران، بەڵام ئەمڕۆ بوونەتە واقیعێکی بەرچاو لە ناوچە جیاوازەکانی جیهاندا.