شفا بارزانی، سەرپەرشتیاری گشتیی ڕەوەندی کوردستانی، بە بۆنەی کۆچی دوایی ڕۆژنامەنووس و سەرنووسەری گۆڤاری گوڵان، فەرهاد محەممەد، پەیامێکی سەرەخۆشیی ئاراستەی خانەوادەکەی، ستافی گۆڤاری گوڵان و سەرجەم ڕۆژنامەنووسانی کوردستان کرد.
لە پەیامەکەدا کە ئەمڕۆ هەینی (١٣ی تشرینی دووەمی ٢٠٢٦) بڵاوکراوەتەوە، ئاماژە بەوە کراوە کە کۆچی دوایی فەرهاد محەممەد، وەک قەڵەم بەدەستێکی دیار، ڕۆشنبیرێکی خەمخۆر و کەسایەتییەکی ناسراوی بواری ڕۆشنبیری و ڕاگەیاندن، کەلێنێکی گەورە لە نێوەندی ڕۆژنامەگەریی کوردیدا جێدەهێڵێت و لە دڵەوە هەمووانی خەمبار کردووە.
سەرپەرشتیاری گشتیی ڕەوەندی کوردستانی لە پەیامەکەیدا تیشکی خستووەتە سەر ڕۆڵ و پێگەی خوالێخۆشبوو و ڕایگەیاندووە: «خوالێخۆشبوو بە درێژایی تەمەنی پیشەیی خۆی، نموونەیەکی بەرزی دڵسۆزی، سەنگینی و پابەندبوون بوو بە بەها نیشتمانییەکانەوە». هەروەها جەختی کردووەتەوە کە لە ڕێگەی گۆڤاری گوڵان و نووسین و کارە ڕۆژنامەوانییەکانییەوە توانیویەتی خزمەتێکی گەورە بە وشە و فەرهەنگی کوردی بکات و ببێتە پردێکی پتەوی زانیاری و هۆشیاری بۆ خوێنەرانی ناوخۆ و کوردستانیانی دەرەوەی وڵاتیش.
لە بەشێکی دیکەی پەیامەکەیدا، شفا بارزانی بە ناوی خۆی و ڕەوەندی کوردستانییەوە هاوبەشیی ماتەمینی و پرسە و سەرەخۆشیی خۆی ئاراستەی خانەوادەی خوالێخۆشبوو، هاوکاران و هاوپیشەکانی لە گۆڤاری گوڵان و تەواوی ڕۆژنامەنووسانی کوردستان کردووە.
لە کۆتایی پرسەنامەکەشدا دووپات کراوەتەوە کە یاد و بەخششە فیکری و پیشەییەکانی فەرهاد محەممەد هەمیشە بە زیندوویی دەمێننەوە، هاوکات نزای خواستووە پەروەردگاری مەزن گیانی بە بەهەشت شاد بکات و سەبووری و ئۆقرەیی ببەخشێتە دڵی هەموو لایەک.