شارهزایهكی كهشناسی ڕایدهگهیهنێت كه لە ئەنجامی لاوازبوونی کاریگەریی بارستە هەوای فێنکی دەریای ناوەڕاست، لەمڕۆ شەممەوە پلەکانی گەرما بەراورد بە رۆژانی ڕابردوو ٣ تا ٥ پلە بەرزدەبنەوە.
بەپێی پێشبینییەکان، کەشوهەوا لەم ماوەیەدا جێگیر دەبێت و بەرزترین پلەی گەرما لە سەنتەری پارێزگاکان دەکەوێتە سەرووی ٣٠ پلەی سیلیزی، لە کاتێکدا لە ناوچەکانی گەرمیان و کەرکووک پلەکانی گەرما بۆ سەروو ٣٥ پلە بەرز دەبنەوە.
ئاراس جهبار، شارهزای كهشناسی ئاماژەی بەوەش کردووە کە بۆ رۆژی دووشەممەی داهاتوو بارستەهەوایەکی فێنک جارێکی دیکە ناوچەکانی هەرێمی کوردستان دەگرێتەوە و دەبێتە هۆی نزمبوونەوەی کەمێکی پلەکانی گەرما، بەڵام ئەم کاریگەرییە کەمخایەن دەبێت. لە بەرامبەردا، لە رۆژی ٢٧ی مانگەوە کە هاوکاتە لەگەڵ یەکەم رۆژی جەژنی قوربان، بارستەهەوایەکی گەرم روو لە ناوچەکە دەکاتەوە و پلەکانی گەرما بە ڕێژەیەکی بەرچاوتر بەرز دەبنەوە، لەگەڵ مانەوەی ئاسمان بە زۆری بە نیمچەهەوری.
سەبارەت بە بەرزترین پلەکانی گەرمی لە رۆژانی جەژنی قورباندا، ئەو شارەزایە پێشبینی دەکات کە پلەکانی گەرما لە شار و ئیدارە جیاوازەکان بەم شێوەیە بن: هەولێر ٣٤ پلە، سلێمانی ٣٢ پلە، دهۆک ٣٢ پلە، هەڵەبجە ٣٣ پلە، و کەرکووک ٣٦ پلەی سیلیزی. ههروهها لە ئیدارەی گەرمیان بەرزترین پلە دەگاتە ٣٨ پلە، لە ئیدارەی راپەڕین ٣٢ پلە و لە ئیدارەی سۆران ٢٩ پلەی سیلیزی دەبێت.