ئەمڕۆ پێنجشەممە (19ی تشرینی دووەمی 2026)، لە شاری هەولێری پایتەخت، چوارەمین کۆنفرانسی زانستی نەخۆشییەکانی خوێن بە ئامادەبوونی د. پشتیوان سادق، وەزیری ئەوقاف و کاروباری ئایینی؛ د. سامان بەرزنجی، وەزیری تەندروستی؛ ئومێد خۆشناو، پارێزگاری هەولێر؛ د. دلۆڤان محەمەد، بەڕێوەبەری گشتیی تەندروستیی هەولێر؛ و ژمارەیەکی بەرچاو لە پزیشکان، پسپۆڕان، ئەکادیمییان و شارەزایانی بواری پزیشکی بەڕێوەچوو.
ئامانجی سەرەکیی ئەم کۆنفرانسە زانستییە، بریتییە لە خستنەڕووی نوێترین پێشکەوتن و داهێنانە زانستییەکان لە بواری دەستنیشانکردن و چارەسەرکردنی نەخۆشییەکانی خوێن، هەروەها ڕەخساندنی دەرفەتێکی گونجاو بۆ ئاڵوگۆڕکردنی زانیاری و ئەزموونی پزیشکی لە نێوان پسپۆڕانی ناوخۆیی و شارەزایانی بیانی و ناوچەکەدا، بە مەبەستی بەرزکردنەوەی ئاستی خزمەتگوزارییە تەندروستییەکان لە هەرێمی کوردستان.
لە میانەی کارەکانی ئەم کۆنفرانسەدا، چەندین پانێڵی زانستی، توێژینەوەی ئەکادیمی و گفتوگۆی پسپۆڕانە پێشکەش دەکرێن، کە تێیدا تیشک دەخرێتە سەر ڕێگەچارە سەردەمییەکان بۆ بەرەنگاربوونەوەی نەخۆشییە جۆراوجۆرەکانی خوێن، چۆنیەتی پەرەپێدانی تواناکانی ستافی پزیشکی و دابینکردنی باشترین شێوازەکانی چاودێریکردنی نەخۆشان لە ناوەندە تەندروستییەکاندا.
بەڕێوەچونی ئەم جۆرە کۆنفرانسانە لە هەولێری پایتەخت، وەک بەشێک لە هەوڵە بەردەوامەکانی وەزارەتی تەندروستی و دامەزراوە پزیشکییەکان دادەنرێت، بە ئامانجی پێشخستنی ژێرخانی زانستی و تەندروستی و بەستنەوەی پزیشکانی کوردستان بە نوێترین ستاندارد و پێشکەوتنە جیهانییەکانەوە.

