جوتیارانی ڕۆژئاوای کوردستان بۆ سێیەم ڕۆژ لە ناڕەزایەتییەکانیان بەردەوامن و داوا دەکەن ئیدارەی خۆسەر نرخی گەنم بەرز بکاتەوە.
لە ڕۆژی سێیەمیشدا جووتیاران و دانیشتوانی شاری عامودا ڕژانە سەر شەقامەکان و داوای کڕینی گەنمیان لە ئیدارەی خۆسەر کرد کە بە ٣١ سەنت بۆ هەر کیلۆیەک دیاریکرابوو.
ئەمڕۆش جووتیارانی قامیشلۆ لە ناڕەزایەتی دەربڕین و خوازیاری بڕیارێکی نوێن لەسەر نرخی گەنم بەردەوامن.
دوێنێ لە شارەکانی دێربێسی، قامیشلۆ، کۆبانی، ڕەقە و دێرەزوور خەڵک مانیان گرت و داوایان لە ئیدارەی خۆسەری کرد کە ڕەچاوی ڕاگرتنی جووتیاران و تێچووی گرانبەهای بەروبوومی ئەمساڵ بکات.
حکومەتی سووریا نرخی یەک کیلۆ گەنمی بە پێنج هەزار و 500 لیرەی سووریا (نزیکەی 31 سەنتی ئەمریکایی) دیاری کردبوو.