بەهۆی ئاگرکەوتنەوە لە نەخۆشخانەی قائمی شاری ڕەشت لە پارێزگای گێڵانی ئێران ٩ نەخۆش مردن.
دکتۆر محەمەدتەقی ئاشووبی، سەرۆکی زانکۆی پزیشکیی گێڵان بە میدیاکانی ئێرانی گوت، لە ١٤٢ نەخۆشی نێو نەخۆشخانەکە ٩ نەخۆش کە لە بەشی چاوەدێری چڕ خەوێندرابوون و دۆخی تەندروستییان ناجێگیر بوو، گیانیان سپاردووە و ئەگەری زیادبوونی ژمارەی قوربانییەکانیش هەیە.
شەهرام مۆئمینی، بەڕێوەبەری ڕێکخراوی بەرگریی شارستانیی شاری ڕەشتیش دەڵێت، ئاگرەکە کاتژمێر ١:١٥ی بەرەبەیانی ڕووی داوە و دوای سێ کاتژمێر کۆنترۆڵ کراوە.
مۆئمینی دەشڵێت، ئاگرەکە لە ژێرزەمینی نەخۆشخانەکەوە پەرەی سەندووە و لێکۆڵینەوە لە هۆکارەکەی دەستی پێ کردووە.