دیوانی چاودێریی دارایی هەرێمی كوردستان ئاشكرای دەكات، ئەمڕۆ لێکتێگەیشتنی زۆر باش هەبووە و سبەی لە بەغدا کۆبوونەوەی گرنگ لەسەر پرسی مووچە دەکرێت.
د. محەمەد زراری، بەڕێوەبەری گشتی له دیوانی چاودێریی دارایی هەرێمی کوردستان، رایگەیاند: “ئەو هەواڵەی هەندیک کەناڵ باسی دەکەن کە کۆبوونەوەی ئەمڕۆی دارایی هەرێم و فیدڕاڵ بێ ئەنجام بووە، بە پێچەوانەوە کۆبوونەوەیەکی باش بووو لێکتێگەیشتی زۆر باش کراوە.”
ئاماژەی بەوەش دا “کۆبوونەوەی ئەمڕۆی هەردوو وەزارەت کە ئێمەشی تێدا بوو، زیاتر هونەری بووە و تیایدا بابەتەکان خراوەتە ڕوو، نەک بڕیاری پێ دەربکرێ.”
بەڕێوەبەری گشتی له دیوانی چاودێریی دارایی هەرێمی کوردستان ئاشکراشی کرد: “کۆبوونەوە سەرەکییەکە سبەی پێنجشەممە دەبێت کە شاندی هەردوو وەزارەت و دیوانی چاودێریی دارایی بەسەرپەرشتی دکتۆر فوئاد حوسێن و تەیف سامی دەبێت.”
ئەمڕۆ بەیانی بەرپرسێكی وەزارەتی دارایی هەرێمی كوردستان رایگەیاندبوو: “دوێنێ دوو تیمی وەزارەتی هەرێمی کوردستان گەیشتنە بەغدا و لەسەر مووچەی مانگی حەوت و هەشت لەگەڵ دارایی فیدراڵ گفتوگۆ دەکەن.”
ئاماژەی بەوەش دا، تیمەکان پێکهاتوون لە چەند بەڕێوەبەرێکی گشتی و چەند بەرپرسێک، لەوانە بەڕێوەبەرانی گشتیی ژمێرکاریی بودجە و بەڕێوەبەری جووڵەی دراو، هەروەها بەڕێوەبەری گشتیی دیوانی چاودێریی دارایی هەرێمی کوردستان و چەند بەرپرسێکی دیکە.