لە یارییەکانی خولی سێیەمی چامپیۆنزلیگ یانەی بەرشەلۆنە میوانداری بایرن میونشنی ئەڵمانی کرد.
لە ئەنجامدا یانە کەتەلۆنیەکە توانی بە ئەنجامێکی گەورە و بە چوار گۆڵ بەرامبەر بە گۆڵێک شکست بە بایرن بهێنێت.
هەر لەگەڵ دەستپێکی تایمی یەکەم و لە خولەکی یەکەمدا بارسای خاوەن یاریگا زەبری خۆی وەشاند و رافینیا گۆڵی یەکەمی تۆمارکرد، دوای تێپەڕبوونی چەند هێرشێکی هەردوو یانە، یاریزان هاری کەین لە خولەکی 18 ئەنجامەکەی یەکسانکردەوە،
هەوڵەکان بەردەوامبوون و بارسای خاوەن یاریگا توانی دوو گۆڵی دیکە لە خولەکەکانی 36 و 45 لەلایەن لیڤا و رافینیا تۆمار کردەوە.
لە تایمی دووەمدا بایرن باشتر گەڕایەوە و فشارەکانی چڕکردەوە لەپێناو تۆمارکردنی گۆڵی زیاتر، بەڵام بەرشەلۆنە هەرزوو میوانەکەی بێهیواکرد کاتێک رافینیا گۆڵی سێیەمی خۆی و چوارەمی لە خولەکی 56 تۆمارکرد و یارییەکەش بەو شێوەیە کۆتاییهات.
بەم سەرکەوتنە، بەرشەلۆنە کۆی خاڵەکانی گەیاندە شەش خاڵ و بایرنیش تەنیا سێ خاڵی هەیە.