هەناردەی مافووری دەستچنی ئێران لە ماوەی حەوت ساڵدا ١٠ هێندە دابەزیوە و لە کاتێکدا ئەم وڵاتە ساڵی ٢٠١٧ بە بەهای ٤٢٦ ملیۆن دۆلار فەرشی هەناردە کردووە، لە ساڵی ٢٠٢٣ ئەو قەبارەی هەناردەیە دابەزیوە بۆ کەمتر لە ٤٠ ملیۆن دۆلار.
مورتەزا حاجی‌ئەمیری، سەرۆکی لیژنەی مافوور، هونەر و پیشەسازییە دەستییەکانی ژووری بازرگانیی ئێران، بە ئاژانسی هەواڵی ئیلنای گوتووە، سزاکانی ئەمریکا و سیاسەتە هەڵەکانی ناوخۆ سەبارەت بە دراوی بیانی، بەتایبەتی بەڵێندەرایەتیی دراو، هۆکارە سەرکییەکانی ئەو دابەزینەی قەبارەی هەناردەی فەرشی وڵاتەکەن.
حامید چەمەنڕوخ، جێگری سەرۆکی سەندیکای بەرهەمهێنەرانی مافووری دەستچنی ئێرانیش لە مانگی ئاداری ئەمساڵ گوتی، ئێستا هەناردەی فەڕشی دەستچنی وڵاتەکەی سفرە، چونکە لەدوای نەوت و مووشەک، سێیەمین سزای ئەمریکا دژی ئێران خراوەتەوە سەر مافووری دەستچنی ئەم وڵاتە.
