وەزیری دەرەوەی فەرەنسا ڕایگەیاند، ئەمڕۆ ژمارەیەک لە سزاکان لەسەر سووریا هەڵدەگرن.
ئاژانسی ڕۆیتەرز لە زمان وەزیری دەرەوەی فەرەنسا “ژان نۆێل بارۆ”وە بڵاوی کردووەتەوە، ئەمڕۆ فەرەنسا ژمارەیەک سزا لەسەر سووریا هەڵدەگرێت هەروەها پێشنیاری سەپاندنی سزاکان لەسەر ئەو بەرپرسانی ئێرانی دەکات دەستیان لە گرتنی هاووڵاتیانی فەرەنسی لە ئێران دایە.
هەروەها کایا کالاس کۆمیسیاری یەکێتیی ئەورووپا بۆ کاروباری دەرەوە گوتی، ئەو پێشبینی دەکات ئەمڕۆ یەکێتیی ئەورووپا سزاکان لەسەر سووریا سووک بکات.
بڕیارە ئەمڕۆ وەزیرانی دەرەوەی یەکێتی ئەوروپا لە برۆکسل کۆببنەوە و یەکێک لەو بابەتانەی کە گفتوگۆی لەسەر دەکەن بابەتی سووک کردنی سزاکانە لەسەر سووریا.
