ڕافائێل گڕۆسی، بەڕێوەبەری گشتیی ئاژانسی نێودەوڵەتیی وزەی ئەتۆمی، بڕیارە ڕۆژی چوارشەممە سەردانی تاران بکات، ئەمەش چەند ڕۆژێک بەر لە دەستپێکردنی گەڕی دووەمی دانوستانەکانی نێوان ئێران و ویلایەتە یەکگرتووەکانی ئەمریکا دێت کە چاوەڕوان دەکرێت ڕۆژی شەممە، ١٩ی نیسان، بەڕێوەبچێت.
کازم غەریبئابادی، جێگری وەزیری دەرەوەی ئێران بۆ کاروباری یاسایی و نێودەوڵەتی، بە میدیاکانی ناوخۆی وڵاتەکەی ڕاگەیاندووە کە گڕۆسی لە سەردانەکەیدا لەگەڵ هەریەک لە وەزیری دەرەوە و سەرۆکی ڕێکخراوی وزەی ئەتۆمیی ئێران کۆدەبێتەوە و گفتوگۆ دەکات.
غەریبئابادی جەختی لەوەش کردووەتەوە کە ئەم سەردانە لە چوارچێوەی بەردەوامیی هاریکاری و هەماهەنگییەکانی نێوان ئێران و ئاژانسی نێودەوڵەتیی وزەی ئەتۆمیدایە.
پێشتریش، ڕافائێل گڕۆسی لە لێدوانێکدا بۆ تەلەڤیزیۆنی فەرمیی چین، پشتیوانیی خۆی بۆ دانوستانەکانی نێوان ئێران و ئەمریکا دەربڕیبوو و ڕایگەیاندبوو کە بەرنامە ئەتۆمییەکەی ئێران پێویستی بە ڕێککەوتنە و پێویستە ئەو ڕێککەوتنە بە زووترین کات ئەنجام بدرێت.
سەردانی بەڕێوەبەری گشتیی ئاژانسی نێودەوڵەتیی وزەی ئەتۆمی بۆ تاران، لەم کاتەدا و بەر لە دەستپێکردنی گەڕێکی نوێی دانوستانەکانی نێوان بەرپرسانی ئێران و ئەمریکا، بە هەنگاوێکی گرنگ هەژمار دەکرێت و چاوەڕوان دەکرێت گفتوگۆکان تیشک بخەنە سەر چالاکییەکانی چاودێری و پشکنینی ئاژانس لە دامەزراوە ئەتۆمییەکانی ئێران.
