وەزارەتی ناوخۆی تورکیا، لە زاری عەلی یەرلیکایا، وەزیری ناوخۆی وڵاتەکەوە، دەستگیرکردنی ٢٣٤ کەسی ڕاگەیاند، کە وەک سەرکردەی گرووپە تاوانکارییەکان و بازرگانی ناوخۆیی و نێودەوڵەتی ماددە هۆشبەرەکان ناسێنراون.
یەرلیکایا ئاشکرای کرد ئەم ئۆپەراسیۆنە بە هاوکاریی پۆلیسی وڵاتانی بەلجیکا، ئەڵمانیا، ئیسپانیا و هۆڵەندا ئەنجام دراوە. ڕوونیشی کردەوە کە لە کۆی دەستگیرکراوەکان، ٢٢٥ کەسیان ناوخۆیی و ٩ کەسی دیکەیان بیانی بوون.
بە گوتەی وەزیری ناوخۆی تورکیا، سەرجەم تۆمەتباران داواکراوی پۆلیسی نێودەوڵەتی (ئینتەرپوڵ) بوون و تۆمەتبارن بە بازرگانیکردن بە ماددە هۆشبەرەکان، سپیکردنەوەی پارە، کوشتن و ڕفاندنی هاووڵاتیان.
یەرلیکایا ئاماژەی بەمەش کرد، لە چوارچێوەی ئۆپەراسیۆنەکەدا، دەست بەسەر سەدان نووسینگە، ئۆتۆمبێل و هەژماری بانکیدا گیراوە، کە بەهاکەیان بە زیاتر لە ٣٤١ ملیۆن دۆلاری ئەمریکی دەخەمڵێندرێت.