ئەنجوومەنی نیشتمانیی کورد لە سووریا (ئەنەکەسە) بڵاوی کردەوە شاندێکی هاوبەشی پارتی یەکسانی و دیموکراسیی گەلان (دەم پارتی) و پارتی هەرێمە دیموکراتەکان (دەبەپە) سەردانی بارەگای ئەنەکەسەیان لە شاری قامیشلۆ کردووە و لەگەڵ دەستەی سەرۆکایەتیی ئەنەکەسە کۆبوونەتەوە.
بەپێی ڕاگەیەندراوی ئەنەکەسە، شاندەکەی باکووری کوردستان پێکهاتبوون لە کەسکین بایدنر هاوسەرۆکی گشتیی دەبەپە، سەرھەد ئارن ئەندامی کۆمیتەی جێبەجێکاری دەم پارتی، و پەرلەمانتاران ساڵحە ئایدەنیز، گولجان کاچماز و محەمەد کاماچ.
شایەنی باسە، شاندی دەم پارتی و دەبەپە لە 25ی نیسانەوە بە مەبەستی بەشداریکردن لە “کۆنفرانسی یەکڕیزی و یەکهەڵوێستیی کوردی” لە ڕۆژئاوای کوردستانن.
فەیسەڵ یوسف، گوتەبێژی ئەنەکەسە، ڕایگەیاند کە شاندی میوان پیرۆزبایی سەرکەوتنی کۆنفرانسەکەیان لە ئەنەکەسە کردووە و هیوای بەردەوامییان بۆ کارەکانیان خواستووە.
هەواڵی پێشوو