ئەمڕۆ (دووشەممە)، مامەڵەکان لە بازاڕی بۆرسەی دیمەشق، دوای ماوەی نزیکەی شەش مانگ لە ڕاگرتنی، دەستی پێکردەوە. ئەم ڕووداوە بە ئامادەبوونی فەرمیی هەندێک بەرپرسی سووریایی و بەشداریی بەرفراوانی کەسایەتییە ئابوورییەکان، وەبەرهێنەران و بازرگانان بەڕێوەچوو.
بەگوێرەی ئاژانسی هەواڵی فەرمیی سووریا (سانا)، محەمەد یەسر بەرنیە، وەزیری داراییی سووریا، گوتی: «کردنەوەی دووبارەی بازاڕی بۆرسەی دیمەشق پەیامێکە؛ ئابووریی سووریا دەستی بە جووڵە و بووژانەوە کردووە.»
ناوبراو زیادی کرد: «ئەم بازاڕە دەبێتە کۆمپانیایەکی تایبەت و نێوەندێکی ڕاستەقینە بۆ پەرەپێدانی ئابووریی سووریا و هەوڵ دەدەین هاوشانی گۆڕانکارییە دیجیتاڵییەکان بین.»
وەزیری دارایی درێژەی پێدا: «دیدگای ئابووریی ئێمە لەسەر بنەمای دادپەروەری، ڕەوایەتی، پێشەنگایەتیی کەرتی تایبەت و ڕاکێشانی وەبەرهێنانە. هەوڵ دەدەین کارەکان ئاسان بکەین و دەرفەتی وەبەرهێنانی هاندەرانەمان لەپێشە.»
لەلایەکی دیکەوە، باسل ئەسعەد، بەڕێوەبەری جێبەجێکاری بازاڕی بۆرسەی دیمەشق، گوتی: «کردنەوەی دووبارەی بازاڕی بۆرسەی دیمەشق ڕۆژێکی مێژوویی گرنگە بۆ سووریا. ئامادەین لە داهاتوویەکی نزیکدا ڕۆڵی خۆمان دەست پێبکەینەوە، لەوێ وەبەرهێنانەکان بەرفراوانتر و گەورەتر دەبن.»
پێشتر، وەزیری داراییی سووریا ڕایگەیاندبوو، بازاڕی بۆرسەی دیمەشق ڕۆژی دووشەممە، ٢ی حوزەیرانی ٢٠٢٥، دوای تەواوبوونی پێداچوونەوەکان و ڕێوشوێنە پێویستەکان، دووبارە دەکرێتەوە.
ناوبراو گوتی، ڕێوشوێنی توند بۆ دڵنیابوون لە سەلامەتیی بازاڕی بۆرسە و بەرەنگاربوونەوەی سپیکردنەوەی پارە گیراوەتەبەر.
هەواڵی پێشوو