شانەی ڕاگەیاندنی ئەمنی عێراق ڕایگەیاند، چاودێری دوو فڕۆکەی بێفڕۆکەوانی نەناسراویان کردووە کە ئاسمانی بەغدایان پێشێل کردووە، یەکێکیان کەوتووەتە خوارەوە و ئەوی دیکەیان سەربازگەی تاجی بۆردومان کرد.
سێشەممە، 24-6- 2025، سەرۆکی شانەی ڕاگەیاندنی ئەمنی، سەعد مەعن، لە ڕاگەیاندراوێکدا گوتی: “بەرەبەیانی ئەمڕۆ فڕۆکەیەکی بێفڕۆکەوانی نەناسراو، ڕادارێکی ناو سیستەمی بەرگری ئاسمانی سەربازگەی تاجی بۆردومانکردووە.”
ئاماژەی بەوەش کرد، فڕۆکەیەکی دیکە لە نزیک مۆلیدەی کارەبا کەوتووەتە خوارەوە، دەشڵێت، بەهۆی ڕووداوەکەوە هیچ کەس نەمردووە و بریندار نەبووە.
لەلایەکی دیکەوە سەرچاوەیەکی ئەمنی ئەوەی ئاشکرا کردووە، ڕادارێکی دیکە لە بنکەی ئاسمانی ئیمام عەلی لە پارێزگای زیقار لەلایەن فڕۆکەیەکی بێفڕۆکەوانەوە بۆردومان کراوە و بتەواوی لەناو براوە.
گوتیشی: دوای دوو کاتژمێر لە ڕووداوەکە لیژنەیەکی وەزارەتی بەرگری گەیشتوونەتە شوێنی ڕووداوەکە، ئاماژەی بەوەش کرد، لیژنەکە هەڵسەنگاندن بۆ دۆخی ئەمنی و زیانەکانی شوێنەکە دەکات.