گوتەبێژی وەزارەتی دەرەوەی ئێران: پەیوەندییەکانمان لەگەڵ ئەورووپا بەردەوامە

ئیسماعیل بەقایی ڕایگەیاند، پەیوەندیی دیپلۆماسیی نێوان ئێران و وڵاتانی ئەورووپا لە ئاستە جیاوازەکاندا بەردەوامە و ئاماژەی بە پەیوەندییە تەلەفۆنییەکەی شەوی ڕابردووی سەرۆککۆماری ئێران و سەرۆکی فەڕەنسا کرد.
ئیسماعیل بەقایی، گوتەبێژی وەزارەتی دەرەوەی ئێران ڕایگەیاند: “ئێمە لەگەڵ وڵاتانی ئەورووپایی پەیوەندیی دیپلۆماسیی ئاساییمان هەیە و لە ئاستی جیاوازدا گفتوگۆکان بەردەوامن. هەر شەوی ڕابردوو سەرۆککۆماری وڵاتەکەمان لەگەڵ هاوتا فەڕەنساییەکەیدا گفتوگۆی کرد، کەواتە پەیوەندییەکان لە نێوان ئێران و سێ وڵاتە ئەورووپاییەکەدا بەردەوامە.”
سەبارەت بە دەستپێکردنەوەی دانوستانەکان، بەقایی گوتی: “لەبارەی خواستی درێژەدان بەو گفتوگۆیانەی هەفتەی ڕابردوو، هێشتا ڕێککەوتێکی دیاریکراومان نییە، ئەگەر بڕیاری کۆتایی لەبارەوە درا، بێگومان ڕایدەگەیەنین.”