بەرپرسێکی باڵای ئاک پارتی پێکهێنانی کۆمیسیۆنەکە پشتڕاست دەکاتەوە و ئەندامێکی شاندی ئیمراڵیش چەکدانانەکە بە “هەنگاوێکی مێژوویی” ناوزەد دەکات.
کاردانەوەکانی ڕێوڕەسمی چەکدانانی پارتی کرێکارانی کوردستان (پەکەکە) بەردەوامن و بەرپرسانی تورکیا ئەم هەنگاوە بە گرنگ وەسف دەکەن. ئەفکان ئاڵا، جێگری سەرۆکی گشتیی ئاک پارتی، بە میدیاکانی تورکیای ڕاگەیاند، گەیشتن بە قۆناغی چەکدانان زۆر گرنگە و لە ماوەی یەک بۆ دوو هەفتەی داهاتوودا کۆمیسیۆنێکی تایبەت لە پەرلەمانی تورکیا پێک دەهێنرێت.
ئاڵا گوتی: “پرۆسەکە وەک پلانی بۆ داڕێژراوە بەڕێوە دەچێت و هەوڵی تێکدانیش هەن، بۆیە بە هەستیارییەوە مامەڵە دەکەین.” هەروەها ئاماژەی بەوە دا کە کۆمیسیۆنەکە لە ٣٠ بۆ ٣٥ کەس پێک دێت و نوێنەری هەموو پارتەکان لەخۆ دەگرێت.
لەلایەکی دیکەوە، میتحەت سانجار، ئەندامی شاندی ئیمراڵی، لە چاوپێکەوتنێکی تایبەتدا لەگەڵ کوردستان٢٤ ڕایگەیاند، پاش ٤١ ساڵ شەڕ، چەکدانانی پەکەکە هەنگاوێکی مێژووییە بۆ کورد و تورک و هەموو گەلانی ناوچەکە.
دوای ئەم پێشهاتانە، دەم پارتیش جووڵەکانی خێراتر کردووە و بڕیارە شاندی ئەو پارتە لەگەڵ سەرۆکی گشتیی مەهەپە دەوڵەت باخچەلی، سەرۆکی پارتی ئاییندە ئەحمەد داوودئۆغڵو، وەزیری داد یلماز تونج و سەرۆکی گشتیی جەهەپە ئۆزگور ئۆزەل کۆ ببێتەوە.
