کۆنفیدراسیۆنی ڕەوەندی کوردستانی هێرش بۆ سەر میرحازم تەحسین بەگ، میری ئێزدییانی جیهانی ئیدانە کرد و دەڵێ ئەم هەوڵە نەزۆکانە بۆ لێکترازانی خوشک و برا ئێزدییەکانمانە.
ڕۆژی چوارشەممە 6ی ئابی 2025، کۆنفیدراسیۆنی ڕەوەندی کوردستانی لە بەیاننامەیەکدا پشتگیریی تەواوی خۆی بۆ میرحازم ڕاگەیاندووە و دەڵێت: هەموو هەوڵەکان بۆ ناوزڕاندن و شکاندنی کەسایەتییان ئیدانە دەکەین.
لە بەیاننامەکەدا بە ئاماژەکردن بەوەی میر حازم، میری کوردی ئێزدییەکانە له کوردستان و جیهان و ناوێکی گەورە و کەسایەتییەکی پڕ شکۆیە، جەخت کراوەتەوە ئەوەی بەرامبەر میر حازم کرا، بەشێکە لەو هەوڵە نەزۆکانەی بۆ لێکترازانی خوشک و برا ئێزدییەکانمان دەکرێت و مخابن هەندێ کەس بە نەزانی تێی کەوتوون، بێ ئەوەی هەست بەو پیلانانە بکەن، کە دژ بەسەرجەم خوشک و برا ئێزدییەکانمان دەکرێن.
ڕۆژی سێشەممە گرتە ڤیدیۆیەک لە تۆڕە کۆمەڵایەتییەکاندا بڵاو بووەوە کە تێیدا گەنجێکی ئێزدی لە شاری بەرلینی ئاڵمانیا، بێڕێژی بە میرحازم تەحسین بەگ، میری ئێزدییەکانی کوردستان و جیهان دەکات و ئەمەش ناڕەزایەتییەکی بەربڵاوی لە نێو کەسایەتی و هاووڵاتییانی کوردستان لێ کەوتووەتەوە.