ئیدارەی پەیوەندییەکانی ڕووسیا، “ڕۆسکۆمنادزۆر” (Roskomnadzor)، پەیامێنەرەکانی واتسئاپ و تێلێگرامی لەم وڵاتەدا بە توندی سنووردار کردووە. ئەم دامەزراوەیە بە ئاژانسی هەواڵیی تاس ڕاگەیاندووە کە بە مەبەستی ڕووبەڕووبوونەوەی تاوان و گەندەڵی، پەیامێنەرە بیانییەکانی سنووردار کردووە. بە گوتەی ئەم ئیدارە حکوومەتییەی ڕووسیا، واتسئاپ و تێلێگرام گرنگترین ئامرازن بۆ فێڵکردن، باجگرتن و کاریگەریی خستنەسەر هاووڵاتییانی ڕووسیا لە ڕێگەی تێکدانی زنجیرەییەوە.
میدیاکانی ڕووسیا لە ڕۆژی دووشەممەوە هەواڵی سنووردارکردنی توند و بەرفراوانی ئەم دوو پەیامێنەرەیان بڵاو کردووەتەوە، بەتایبەتی لە باشووری ئەم وڵاتە. لە وێبسایتی ئیدارەی پەیوەندییەکانی ڕووسیادا نووسراوە کە دەستڕاگەیشتن بەم پەیامێنەرانە زۆر خاوە یان بە تەواوی بلۆک کراوە.
ئەم دامەزراوە حکوومەتییەی ڕووسیا لە مانگی ئابیشدا واتسئاپ و تێلێگرامی بە تیرۆر و فێڵ تۆمەتبار کردبوو.
لە ساڵی ٢٠٢٤ەوە، دوو پەیامێنەری سیگناڵ و ڤایبەر بە تەواوی لە ڕووسیا بلۆک کراون. هەروەها لینکدین، فەیسبووک، ئینستاگرام و زۆرێک لە وێبسایتەکانی دیکە بەبێ ڤیپیئێن (VPN) بەردەست نین.
ئیدارەی پەیوەندییەکانی ڕووسیا ڕایگەیاندووە کە خەڵک دەتوانن لە جیاتی هەموو ئەمانە، پەیامێنەری حکوومەتیی “ئەپ ماکس” (App Max) بەکار بهێنن. ڕەخنەگران دەڵێن ئەم پەیامێنەرە ڕێگە بە دامەزراوە حکوومەتییەکان دەدات دەستیان بە زانیارییە کەسییەکانی خەڵک ڕابگات.
