وەزارەتی بازرگانی عێراق رایگەیاند، بۆ هاوردەكردنی ئۆتۆمبێل رێكار و رێسای نوێ جێبەجێ دەكرێت.
محەمەد حەنون، وتەبێژی وەزارەتی بازرگانی عێراق بە رۆژنامەی سەباحی نیمچە فەرمی حكوومەتی عێراقی راگەیاندووە، “ئەو رێسا و رێكارانەی پێشنیارمان كردووە نێردراوە بۆ ئەنجومەنی وەزیران”.
گوتیشی، “رێساكان لە ئەنجومەنی وەزیرانی عێراق خوێندنەوەیان بۆ دەكرێت و چاوەڕوانی ئەوە دەكەین رەزامەندی لەسەر بدەن و بچێتە واری جێبەجێكردنەوە”.
جەختی كردەوە: “وەزارەتی بازرگانی بەهەماهەنگی لەگەڵ لایەنە حكوومییە پەیوەندیدارەكانی دیكەدا كار دەكات بۆ چارەسەركردنی قەیرانی گواستنەوە و قەرەباڵغی و كۆنتڕۆڵكردنی هاوردەكردنی ئۆتۆمبێل”.
گوتەبێژی بازرگانی عێراق ئەوەشی خستە ڕوو: “رێسا نوێیەكانی هاوردەكردنی ئۆتۆمبێل مەبەست لێی رێكخستنی جۆری ئۆتۆمبێلەكان و تایبەتمەندییەكانی و ئەو لایەنانەیە كە هاوردەی دەكەن”.
بەپێی ئامارەكانی وەزارەتی پلاندان، لە عێراقدا نزیكەی هەشت ملیۆن ئۆتۆمبێل هەیە و ساڵانەش بە سەدان هەزار ئۆتۆمبێل هاوردە دەكرێت.