ئەنجومەنی باڵای دادوەریی عێراق، داوای لە هێزە سیاسییەکان کرد پابەندی وادە دەستوورییەکان بن بۆ دیاریکردنی سەرۆک کۆمار و سەرۆک وەزیران. ئەمەش دوای ئەوە دێت کە دانیشتنی ئەنجومەنی نوێنەران تایبەت بە هەڵبژاردنی سەرۆک کۆمار بەهۆی داوای دوو پارتە سەرەکییەکەی هەرێمی کوردستان دواخرا، هەروەها دۆناڵد ترەمپ، سەرۆکی ئەمریکا، کاندیدکردنی نوری مالیکی، سەرۆکی هاوپەیمانی دەوڵەتی یاسای بۆ پۆستی سەرۆک وەزیران ڕەتکردەوە.
ئەم هەڵوێستەی دادوەری لە میانی یەکەمین کۆبوونەوەی ئەنجومەنی باڵای دادوەری بە سەرۆکایەتی دادوەر فایەق زێدان، سەرۆکی دادگای تێهەڵچوونەوەی فیدراڵی هات، بەگوێرەی ڕاگەیەندراوێکی ئەنجومەنەکە.
خاڵە سەرەکییەکانی ڕاگەیەندراوەکە:
• پابەندبوون بە دەستوور: ئەنجومەنی باڵای دادوەری جەختی لە گرنگی پابەندبوون بە وادە دەستوورییەکان کردەوە بۆ تەواوکردنی ڕێکارەکانی دەستنیشانکردنی سەرۆک کۆمار و سەرۆک وەزیران.
• ڕێگری لە دەستوەردان: داوای لە هەموو پارت و هێزە سیاسییەکان کرد کە ڕێز لەم وادانە بگرن و پێشێلی نەکەن، بە مەبەستی پاراستنی سەقامگیری سیاسی و بەڕێوەچوونی پرۆسەی دیموکراسی و ڕێگریکردن لە هەر دەستوەردانێکی دەرەکی.
• دۆسیەی گیراوەکانی سووریا: هەر لەو کۆبوونەوەیەدا، ئەنجومەنەکە باسی لە ڕێکارەکانی لێکۆڵینەوە و دادگاییکردنی ئەو کەسانە کرد کە لە ناوەندەکانی دەستبەسەرکردن لە سووریاوە بۆ فەرمانگەکانی چاکسازی لە عێراق گوازراونەتەوە.