بەڕێوەبەری گشتیی ڕێکخراوی وزەی ئەتۆمیی ئێران ڕایگەیاند وەستاندن لە پیتاندنی یورانیۆم بۆ ئاستی ٦٠٪ تەنها لە بەرانبەر هەڵگرتنی سەرجەم سزاکانی ئەمریکادا ئەنجام دەدرێت.
محەمەد ئیسلامی جەختی کردەوە ئێران ئەندامی پەیمانی پێشگرتن لە بڵاوبوونەوەی چەکی ئەتۆمییە و ئاژانسی نێودەوڵەتیی وزەی ئەتۆمی دەبێ سەرکۆنەی هەر هێرشێک بۆ سەر دامەزراوە ئەتۆمییەکانی ئێران بکات.
ئەو هەروەها گوت گواستنەوەی یورانیۆمی پیتێنراوی ئێران بۆ دەرەوەی وڵات لە بەرنامەی دانوستانەکاندا نییە و ئەگەر ئەم بابەتە باس کراوە، تەنها وەک پێشنیارێکی لایەنە دیکەکان بووە بۆ ئاسانکاریی گفتوگۆکان.
ئەو قسانە لە کاتێکدا دەکرێن کە ڕۆژی هەینی ڕابردوو دانوستانێکی نوێ لەنێوان ئێران و ئەمریکا لە عومان دەستی پێکردووە. ئاژانسی نێودەوڵەتیی وزەی ئەتۆمی پێشتر ڕایگەیاندبوو ئێران ئاستی پیتاندنی یورانیۆمی گەیاندووەتە ٦٠٪، کە نزیکەیە بۆ ئاستی ٩٠٪ ـی پێویست بۆ چەکی ئەتۆمی.