ئاژانسی هەواڵی “ئێرنا” بڵاویکردەوە، ڕۆژی سێشەممە عەلی لاریجانی، سکرتێری ئەنجوومەنی باڵای ئاسایشی نەتەوەیی ئێران، گەیشتە سەڵتەنەتی عوممان. ئەم سەردانە دوای چەند ڕۆژێک دێت لە بەڕێوەچوونی گەڕێکی گفتوگۆ و دانوستان لە نێوان ویلایەتە یەکگرتووەکانی ئەمریکا و کۆماری ئیسلامی ئێران لەو وڵاتە.
بڕیارە لاریجانی لەگەڵ سوڵتان هەیسەم بن تاریق، سوڵتانی عوممان و بەدر بن حەمەد ئەلبوسەعیدی، وەزیری دەرەوەی ئەو وڵاتە کۆببێتەوە. لاریجانی پێشتر ڕایگەیاندبوو، کە تەوەرە سەرەکییەکانی سەردانەکەی بریتین لە تاوتوێکردنی دوایین گۆڕانکارییە ناوچەیی و نێودەوڵەتییەکان، لەگەڵ پەرەپێدانی هەماهەنگییە ئابوورییەکانی نێوان تاران و مەسقەت.
ئەم جوڵە دیپلۆماسییەی ئێران لە کاتێکدایە کە واشنتن جارێکی دیکە هەڕەشەی بەکارهێنانی هێز دەکات. لە بەرانبەردا، تاران جەخت لەوە دەکاتەوە کە دەیەوێت دانوستانەکان تەنیا لە چوارچێوەی بەرنامە ئەتۆمییەکەیدا بن و ڕەتیدەکاتەوە پرسەکانی دیکەی وەک بەرنامە مووشەکییەکەی بخاتە ناو مێزی گفتوگۆکانەوە.
رۆژی هەینی 6ـی شوباتی 2026، دانوستانەکانی ئێران و ئەمریکا لە سەڵتەنەتی عوممان بەڕێوەچوو، کە دوای کۆتاییهاتنی دانوستانەکە هەردوولا کۆبوونەوەکانیان بە ئەرێنی وەسف کرد.