ویلایەتە یەکگرتووەکانی ئەمریکا و کۆماری ئازەربایجان لەسەر دروستکردنی هاوبەشییەکی درێژمەودا گەیشتنە ڕێککەوتن. ئەم ڕێککەوتنە لە باکۆی پایتەختی ئازەربایجان، لەلایەن جی‌دی وەنس، جێگری سەرۆککۆماری ئەمریکا، و ئێلهام عەلییەف، سەرۆککۆماری ئازەربایجان، واژۆ کرا.
بەپێی نێوەرۆکی ڕێککەوتنەکە، هەردوو وڵات هاوکارییەکانیان لە بوارەکانی ئابووری و ئەمنی فراوان دەکەنەوە. لەوانە، هەماهەنگی لە بواری مامەڵەکانی چەک و بەرەنگاربوونەوەی تیرۆریزم ناوبراوە.
وەنس یەک ڕۆژ پێشتر لە ئەرمەنستانیش لەگەڵ نیکۆل پاشینیان، سەرۆک وەزیرانی ئەو وڵاتە، ڕێککەوتنێکی دیکەی واژۆ کردبوو کە فرۆشتنی تەکنەلۆجیای فرۆکەی بێ‌فرۆکەوان (درۆن) و هاوکاری لە بواری وزەی ئەتۆمیی ناچەکداری لەخۆ دەگرت.