دوو هاووڵاتیی کوردی خەڵکی شارۆچكەی (تیکاب)ی سەر بە پارێزگای (ورمێ)ی ڕۆژهەڵاتی كوردستان، بە ناوەکانی (پەروێز ئەمین محەممەدی و بەهمەن موحسینی) بە تەقەی هێزە ئەمنییەكانی ئێران، سەریان بە سەختی بریندار کراوە و هەردووکیان چوونەتە کۆماوە.
بەپێی زانیارییەکان، کاتژمێر 2ی بەرەبەیانی ڕۆژی چوارشەممە 17/4/2024، گەشتی شەوانەی هێزە ئەمنییەكانی ئێران لە نزیک گۆڕەپانی قەڵەمی تیکاب، تەقەیان لە ئۆتۆمبێلی هاووڵاتییەک جۆری (پراید) کردووە و لە ئاکامی ئەو دەستڕێژەدا، دوو هاووڵاتیی کورد بە سەختی بریندار کراون و لە کۆمادان.
بەپێی زانیارییەكان، لە شاری تیکاب، پەروێز ئەمین محەممەدی، تەمەن 29 ساڵ، سەری بریندار بووە و گوللـەکە لە سەریدا ماوەتەوە، ئێستا لە نەخۆشخانەی تیکاب لە کۆمادایە.
هەروەها بەهمەن موحسینی، تەمەن 35 ساڵ، دوای ئەوەی سەری بە گوللـە پێکراوە و گوللـەکە لە زاری دەرچووە، ئێستا لە نەخۆشخانەی خومەینیی ورمێ لە کۆمادایە.
تا ئێستا هۆکاری ئەم تەقەکردنە لەلایەن هێزە ئەمنییەکانی ئێرانەوە ڕوون نەکراوتەوە.