بەهۆی هاتنی شەپۆلێكی بارانبارین و ئەگەری زۆری رێژەی بارانبارین، شارەوانیی هەولێر تیمەكانی دەخاتە ئامادەباشی و هەڵمەتێکی فراوانیش بۆ خاوێنکردنەوەی مەنهۆڵ و چەپەرەکانی ئاو وەرگرتن دەكرێت.
هەڤاڵ سەدیق گەڵۆزی، شارەزای بواری کەشناسی، بە ئاژانسی هەواڵی زاگرۆسی ڕاگەیاند: کە ئەمشەو لە دوای کاتژمێر ٨ شەپۆلێکی بەهێزی بارانبارین بە هەورەبرووسکە و تەرزەوە دەستپێدەکات و هۆشداریشی لە دروستبوونی لافاو لە چەند ناوچەیەک دا.
هەروەها لە سەر ئامادەکاریەکان بۆ هەر حالەتێکی نەخوازراوە سەرۆکایەتیی شارەوانیی هەولێر، ڕاگەیندراوێکی بڵاوی كردەوە و دەلێت: “لەگەڵ پێشبینەکانی کەشوهەوا و هاتنی شەپۆلێکی دیکەی بارانبارین لە کاتژمێرەکانی داهاتوودا، سەرۆکی شارەوانی هەولێر، سەرجەم لیژنەکانی هەر نۆ بەڕێوەبەرایەتیەکانی سەربە سەرۆکایەتی شارەوانی هەولێری ڕاسپارد بۆ جێبەجێکردنی ئامادەکارییەکان و جێگیرکردنی تیم و ئامێرەکان لە کۆڵان و شەقامەکاندا.”
ئاماژە بەوەش دراوە، تیمی بەڕێوبەبەرایەتیی خزمەتگوزاریی و ژینگەپارێزی، هەڵمەتێکی فراوانی خاوێنکردنەوەی مەنهۆڵ و چەپەرەکانی ئاو وەرگرتن و واڵا کردنی سەری زێراب و مەنهۆڵەکان لە تەواوی گەڕەک و شەقامە گشتیەکانی شاری هەولێر دەستپێكرد.
جەخت كراوەتەوە كە هەڵمەتەکە زیاتر بۆ هەموو شوێنانە ئەنجامدرا، کەوا مەترسی کۆبوونەوەی ئاوی لێ دەکرێت، تاوەکو لە ئەگەرەکانی کۆبوونەوەی ئاو و لافاو دوور بخرێتەوە.
ئەوەش خراوەتە ڕوو، ئامێرەکانی شۆفەڵ لەو شوێنانەی کە خاڵی لاوازن بۆ کۆبوونەوەی ئاو جێگیرکراون، تا کۆتایی بەو شەپۆلەی بارانبارین دێ و کەشوهەوا ئاسایی دەبێتەوە.