سەرۆکوەزیرانی هەرێمی کوردستان، دوای بەشدارییکردنی لە مەراسیمی پرسەی ئەو شەش پێشمەرگەیەی کە لە هێرشەکەی ئەم دواییەدا شەهید بوون، لە کۆنگرەیەکی رۆژنامەوانیدا سەرەخۆشی لە بنەماڵەی شەهیدان و خەڵکی کوردستان کرد و جەختی لە بەردەوامیی رێبازی پێشمەرگە کردەوە.
ئەمڕۆ چوارشەممە 25ـی ئازاری 2026، مەسرور بارزانی سەرۆکی حکوومەتی هەرێمی کوردستان، ئامادەی مەراسیمی پرسەی ئەو شەش پێشمەرگانە بوو کە لە هێرشەکەی ئەم دواییەدا شەهید کران. سەرۆکوەزیران سەرەخۆشیی قووڵی خۆی ئاراستەی سەرۆک بارزانی، کەسوکاری سەربەرزی شەهیدان و تەواوی گەلی کوردستان کرد. هیوای زوو چاکبوونەوەشی بۆ ئەو پێشمەرگانە خواست کە لەو هێرشەدا بریندار بوون و رایگەیاند کە حکوومەت لە خەمی تەندروستییاندا دەبێت.
دەقی قسەکانی مەسرور بارزانی
ئەز سەرەخۆشیێ ل جەنابێ سەرۆکی و کەسوکارێد شەهیدان و ل خۆ و ل هەمی خەلکێ کوردستانێ دکەم ب موناسەبەتا شەهیدبوونا وان شەش شەهیدێن قەهرەمان. و داخوازا چاکبوونەڤەژ بۆ وان برینداران دکەم، هیڤیدار ئینشائەڵڵا خودێ رەحمە خۆ پێ بدەت و زوو چێڤە ببەن.
مخابن ئەڤە شەهیدێن غەدر و خیانەتێنە کۆ بێ سەبەب، بێ هۆکار ئەڤ هێرشە هاتیە سەر هێزەکا پێشمەرگەی، کۆمەڵەکا پێشمەرگەیێن مە شەهید بوون. و بێگۆمان خوینا ڤان شەهیدانە کۆ هەمی گاڤا بوویە سەبەب ئەم ب سەربلندی و ب سەربەرزی ل وڵاتێ خۆ دا بژین. و کوردستانی مە ژبەر وێ ب قیمەتە، چۆنکی هەمی گاڤا خوینا شەهیدێن مە تێدا هاتیە رێتن. چو جاران خوینا شەهیدێن مە ب خوسار نەچوویە، ئەڤە جار ژی ب خوسار ناچیت.
و هیڤیا مە ئەوە، ئەو هیڤی و ئۆمێدێت کۆ شەهیدێن مە دگەل خۆ بری، ئینشائەڵڵا ئەو میللەتە رۆژەکێ ب کەیفخۆشی و ب ئازادیا خۆ ببینیت، و سەربلندیا ڤی میللەتی و ڤی وڵاتی ببینیت.
جارەکا دی سەرەخۆشیێ ل هەمی خەلکێ کوردستانێ دکەم و بێژینە وان ژی، ئەم دێ ل سەر رێکا شەهیدێن خۆ یێ بەردەوام بین. و هەمی هیڤی و ئۆمێدا مە ئەوە کوردستانی یا پاراستی بیت. مە نەڤێت تێکەلی چ شەڕان ببین، و مە دڤێت کوردستان یا پاراستی بیت و هەر تشتەکێ لازم ژی بیت بۆ هندێ، بەرگیریێ ل کەرامەت و ماف و ئاخا وڵاتێ خۆ بکەین، دێ بەردەوام بین. و ئنشائەڵڵا خودێ ڤێ دەرفەتێ بدەتە مە، ئەم ژی پێکڤە بین ل سەر ڤێ رێکا بەردەوام بین.
وڵاتێن دنیایێ ژی هەمی نیگەرانن ل سەر ئەڤی وەزعی کۆ هاتیە پێش، و پشتیڤانیا خۆ بۆ خەلکێ کوردستانێ دەربڕی. و ئەم ژی دێ بەردەوام بین بۆ هندێ ل سەر رێکا ڕاست، ل سەر رێکا شەهیدێن خۆ، ل سەر رێکا سەرۆک بارزانی بەردەوام بین.
جارەکا دی سەرەخۆشیێ ل هنگۆ هەمیان دکەم، هوین هەر بمینن ب خێر و خۆشی ئۆن شائەڵڵا. گەلەک سپاس.”