ئەمڕۆ سێشەممە نرخی نەوت ڕووی لە بەرزبوونەوە کرد، ئەمەش دوای ئەوەی دۆناڵد ترەمپ هەڕەشەی توندی لە ئێران کرد کە ئەگەر تەنگەی هورمز نەکاتەوە، زیانی گەورە بە ژێرخانی ئەو وڵاتە دەگەیەنێت. ئەم ئاڵۆزییانە وایکردووە نرخی نەوت لە بازاڕەکاندا پاڵپشتییەکی زیاتر بەدەستبهێنێت.
لە دوای کردنەوەی بازاڕەکانی ئاسیا، نرخی بەرمیلێک نەوتی برێنتی دەریای باکوور 57 سەنت بەرزبووەوە و گەیشتە 110 دۆلار و 34 سەنت. هەروەها نەوتی سووکی تەکساسی ئەمریکاش بەرزبوونەوەی زیاتری بەخۆوە بینی و بە 1 دۆلار و 26 سەنت زیادبوون، گەیشتە 113 دۆلار و 67 سەنت.
شرۆڤەکارانی کۆمپانیای (کەی سی ئێم ترەید) دەڵێن ئێستا بازاڕی نەوت چاوەڕێی هەنگاوەکانی داهاتووە و نرخەکان بە تەواوی بەستراونەتەوە بە لێدوانەکانی ئەمریکا دەربارەی چۆنییەتی مامەڵەکردن لەگەڵ شەڕی ئێران.