ڕۆژنامەی “الشروق”ی میسری هەواڵی دیداری “کەم وێنە و نائاسایی” نوێنەرانی گرووپی حەماس و بزووتنەوەی فەتحی لە کەرتی غەزە بۆ گەیشتن بە ڕێککەوتنێک سەبارەت بە بابەتەکانی پەیوەست بە بەڕێوەبردنی ئەم ناوچەیە بڵاو کردووەتەوە.
بەپێی ئەم ڕاپۆرتە، هەردوو لایەنی فەلەستینی سەبارەت بە داڕشتنی دیدگایەک دەربارەی چەکەکانی حەماس و هەروەها گێڕانی ڕۆڵی “سەرەکی و چالاک”ی دەسەڵاتی خۆبەڕێوەبەریی فەلەستین لە بەڕێوەبردنی کەرتی غەزەدا گفتوگۆیان کرد.
بەرپرسێکی باڵای حەماس بەم ڕۆژنامەیەی گوتووە ئەم گرووپە ئامادەیی خۆی بۆ هاوکاری لەگەڵ دەسەڵاتی خۆبەڕێوەبەریی جێگیر لە ڕامەڵڵا و ڕادەستکردنی تەواوی دەسەڵاتەکانی حوکمڕانی لە غەزەدا بەوان ڕاگەیاندووە. بزووتنەوەی فەتحیش دانوستانەکانی بە “بەرچاو و ئەرێنی” وەسف کردووە.