ئەمڕۆ، لەگەڵ بەردەوامیی مامەڵەکان لە بازاڕەکانی وزەدا، نرخی نەوت گۆڕانکارییەکی کەمی بەسەردا هات و لەسەر ئاستێکی بەرز جێگیر بووە، کە تێیدا نرخەکان بەراورد بە سەرەتای کردنەوەی بازاڕەکان لەمڕۆدا جووڵەیەکی سنوورییان هەبووە.
بەپێی دواین نوێکردنەوەکانی بازاڕ، نرخی هەر بەرمیلێک نەوتی خاوی برێنت گەیشتووەتە 105.4 دۆلار، کە تەنها 10 سەنت بەرزبوونەوەی نیشان داوە. لە بەرامبەردا، نرخی هەر بەرمیلێک نەوتی خاوی سووکی تەکساسی ئەمریکی کەمێک پاشەکشەی کردووە و گەیشتووەتە 99.49 دۆلار، کە بەراورد بە دەسپێکی مامەڵەکان 33 سەنت دابەزیوە.
ئەم جێگیربوونەی نرخەکان لە کاتێکدایە کە بازاڕەکان هێشتا لەژێر کاریگەریی دۆخی سیاسی و دانوستاندنە ناڕاستەوخۆکانی نێوان ئێران و ئەمریکادان. نیگەرانییەکان لەبارەی هەڵاوسان و سەقامگیریی دارایی جیهانی وایکردووە وەبەرهێنەران بە وریاییەوە مامەڵە بکەن، ئەمەش وای کردووە نرخەکان لە چوارچێوەی ئاستە بەرزەکاندا بە جێگیری بمێننەوە.