جۆزێف عەون، سەرۆککۆماری لوبنان دەڵێت کشانەوەی ئیسرائیل لە باشووری ئەم وڵاتە “داواکارییەکی جێگیرە و دانوستانی لەسەر ناکرێت” .
عەون لە بەیاننامەیەکدا بە بۆنەی یادی کشانەوەی ئیسرائیل لە داگیرکاریی باشووری لوبنان لە ٢٥ی ئایاری ٢٠٠٠ گوتی: “ئەمساڵ ساڵیادی ئازادکردن لە کاتێکدا دێتەوە، لوبنان لەژێر باری واقیعێکی پڕ لە ئازاردا چەماوەتەوە.”
هەروەها گوتی: “هێرشەکانی ئیسرائیل نەوەستاون و گوندە ئازیزەکانی باشوورمان هێشتا لە داگیرکاریی دووبارە دەناڵێنن.”
بە گوتەی عەون، “لوبنان ئەمە قبووڵ ناکات”. ڕاشیگەیاند: “ڕێڕەوی کشانەوەی تەواوەتیی ئیسرائیل وەک داواکارییەکی نیشتمانیی بەردەوام دەمێنێتەوە و حکوومەتی لوبنان بۆ گەیشتن بەوە لە ڕێگەی بژاردەی دانوستانەوە هەوڵ دەدات.”
بەرپرسانی ئیسرائیلی گوتوویانە هێزەکانیان “تا کاتی نەمانی هەڕەشەی حیزبوڵڵا” لە باشووری لوبنان دەمێننەوە.
لوبنان و ئیسرائیل مانگی ڕابردوو دانوستانێکی گرنگیان بە ناوبژیوانیی ویلایەتە یەکگرتووەکان دەست پێ کرد و ئێستا خەریکی ئامادەکارین بۆ خولی چوارەمی گفتوگۆکان کە بڕیارە سەرەتای مانگی حوزەیران بەڕێوە بچێت. پێش ئەوەش، دیدارێک لە نێوان شاندە سەربازییەکانی هەردوو وڵات لە پێنتاگۆن لە ٢٩ی ئایاردا ڕێک خراوە.