نەعیم قاسم، ئەمینداری گشتیی حیزبوڵڵا، لە وتارێکدا بە بۆنەی “ڕۆژی بەرگری و ئازادکردن” کە یادی کشانەوەی هێزەکانی سوپای ئیسرائیلە لە داگیرکاریی باشووری لوبنان، داواکاریی داماڵینی چەکی ئەم گرووپەی شەرمەزار کرد.
گوتی: “شتێک بە ناوی قۆرخکردنی چەک یان داماڵینی چەکی حیزبوڵڵا بوونی نییە.”
قاسم هەروەها گوتی، داماڵینی چەکی حیزبوڵڵا “توانای بەرگریی لوبنان و توانای بەرگری و گەلەکەی وەک سەرەتایەک بۆ لەناوبردن” لەناو دەبات. گوتیشی: “داماڵینی چەک بە واتای لەناوبردنە و ئەمەش شتێکە ناتوانین قبووڵی بکەین.”
نەعیم قاسم وێڕای ئاماژەدان بە چەندین هێرش بۆ سەر سەربازانی سوپای ئیسرائیل، ستایشی درۆنە خۆکوژەکانی حیزبوڵڵای کرد کە بە گوتەی ئەو بوونەتە هۆی “سەرلێشێوان”ی ئیسرائیل. ئیدیعای کرد ئەم هێرشانە بوونەتە هۆی کوژرانی چەندین ئەفسەری ئیسرائیلی، لە کاتێکدا سوپای ئیسرائیل ڕایگەیاندووە ئەوان بریندار بوون.
ئەمینداری گشتیی حیزبوڵڵا هەروەها ویلایەتە یەکگرتووەکانی شەرمەزار کرد و گوتی ئەم وڵاتە نە ناوبژیوانە و نە ئەکتەرێکی ڕاستگۆ، چونکە “ئیسرائیل لەسەر بنەمای بەرژەوەندییەکانی خۆی بەڕێوە دەبات.”