وەزیری گواستنەوەی عێراق، وەهب سەلمان محەممەد حەسەنی، ئەمڕۆ سێشەممە، 14-7-2026، بڕیاری دا بەرپرسێکی کۆمپانیای گشتیی بەندەرەکانی عێراق لە ئەرکەکەی لابدات، بیگوازێتەوە و کەسێکی دیکە لە شوێنی ڕابسپێرێت.
بەپێی بەڵگەنامەیەک کە لەلایەن حەسەنییەوە واژۆ کراوە بڕیاردراوە بە لادانی “عەبدولسادە خەلەف فنجان” لە پۆستی یاریدەدەری بەڕێوەبەری گشتی بۆ کاروباری هونەری لە کۆمپانیای گشتیی بەندەرەکانی عێراق، و گواستنەوەی بۆ بەندەری “ئەبو فلوس”.
هەر لە بەڵگەنامەکەدا هاتووە، “هەیسەم کازم هادی” کە پلەی سەرۆکی ئەندازیارانی دەریایی پێشکەوتووی یەکەمی هەیە، ڕاسپێردراوە بۆ وەرگرتنی ئەرکی یاریدەدەری بەڕێوەبەری گشتی بۆ کاروباری هونەری لە کۆمپانیای گشتیی بەندەرەکانی عێراق.